阿芳心曲

一生人緊性，到老還死無變?

教學工作經驗分享、善與人交，係當好个頭路；成時在教學現場就會有你胚想毋著个感動出現。小朋友係天使，做得提供當多教學相長个快樂分你。

毋過，昨晡下晝兩節課上忒咧，愛收揫時節，正發現單槍的布幕捲軸失靈，這正愐起上一節，五年生个兩位小朋友搶等上台來𢯭ten手拉下布幕，兩儕停跎一棧仔跍在該相爭——該央時我全心調電腦，無注意著就這一兩半下，布幕嗄分佢兜揪(kiuˋ，扯)壞忒咧，我一緊性就去總務處報備，主任講無相干，會請人去查看；堵到學務主任，乜[參奏]一下；這拚掃時間，還喊同學請該兩位肇事者過來教室，我分別大嫲牯聲咄（doiˇ，喝斥）佢。包尾，去教務處繳交教學記錄本，又想愛同教務主任講，主任講佢既經知咧，呵!正經係[歪事傳千里]哟!

可見這[小而美]个國小大家彼此關照、資訊交流當緊板。問題也出在吾身項，這種壞事愛[冷處理]，仰般愛擴散消息呢？做得先私下同肇事者溝通，同佢講:

「先生肯定你个熱心，毋過，做事過程當中愛講究技巧，做毋得忒重手，摎東西裝壞忒咧!」像我不分三七二十一先教示學生仔，我還吂處理好自家个[奇蒙子](情緒)，就緊衝衝仔發脾氣，真惡積!本成做得[機會教育]，乜毋會打落小朋友个熱心个[危機處理]，嗄分吾衝動好譴(怒)个性體搣淨淨了!

實在無採！一生人學習恁多[情緒管理]个課程，心肝肚一葩猛火擎起來，燒忒所有个功德。

狗仔改不了食屎？這下个狗仔早就[時代進步]毋食屎咧，我還敢係豬狗不如？