昨晡朝晨台北落雨，尤其12:00點邊仔，親像天公爺用大面盆潑水下來，一陣大風馳雨打忒吾想愛轉通霄个愐法，正打電話分吾家娘同老公，講我講話無算話，落雨恁大，我無愛轉去咧。這央時之前成點鐘仔(這時大約一小時之前)，阿林同阿賴邀請我去河濱公園橋下打嘴鼓，電話正講煞，天時就拚大雨哩!
這陣風馳雨打亂吾个心情，「愛轉抑無愛轉去」一直在吾腦筋打轉，想著該下吾老公在電話肚聽著我無愛轉去，略略仔發譴个口氣：「隨便你!愛無愛轉，你自家決定!」我嗄想愛轉去了。
煞煞查看火車時刻表，13:34松山有一枋海線莒光號。晝也赴毋掣食(中飯也來不及吃)，三步趕做兩步，擎等遮仔(拿起雨傘)，就出門追公車去車頭。買咧車單，正打電話同阿賴、阿林費失禮(道歉)。
16:20下車，在通霄車頭前完成捐血一袋250C.C.，快樂轉屋下。家娘接眼就問：「你毋係無愛轉？仰般又轉來？」
「我想愛轉來看你啊！再過兩日你就愛去米國咧，先看你東西準備好吂？」我看得出佢當歡喜，人逢喜事精神爽，佢一生人無岀國尞幾多擺，妹仔愛渡佢同厥全家四儕共下出國去尞遶，當然鬆爽自然，尤其這旋風臨時決定个，省咧「夜長夢多」个煩惱。我代佢歡喜，也感謝吾小娘姑恁有孝。
今晡日家娘喊我同厥涼鞋拿去分老師傅修理，因爭台北補鞋忒櫃，我輒常轉來補鞋。換一雙鞋底摎糾帶(鬆緊帶)紐仔(鈕扣)，正百五箍(才150)，想著佢做得著等自己合意个鞋，行在米國同六叔、六嬸會面，我也當開心。我還愛渡佢去買一條薄个長褲(佢一生人熱天著洋裝慣仔，無派頭个長褲)，毋過，到這滿(到這時候)佢還毋肯(她還不肯)。
下晝，無閒拜門口「好兄弟」，我又出主意──炸油蔥酥分阿叔姆做等路。其實佢昨晡日，既經燜糯飯好咧！吾叔就好食這兜「故鄉个味緒」，尤其好食甜滋滋仔个各種傳統豆沙餡个粄子、餅仔類。
實在就淨出一張嘴，做嗄無半撇──這就係我，敢死就贏人！
P.S.9/18補記:
包尾吾小娘姑仰般就毋肯帶[糯米飯]過去，驚怕肉類製品分海關沒收；今晡朝晨打早，同吾叔通skype，佢聽著吾家娘親手燜个糯飯無帶過去，感覺當打爽，因為佢還上班，日日愛帶飯包，冷凍个家鄉味，係游子最懷念个味緒。
留言列表
