阿芳心曲

吾家娘盡揀食，

厥嘴斗無好，

略略仔臭臊魚仔一滴就毋敢食。

毋過，

佢一生人就擎鑊鏟慣慣，

較仰般自家無愛食的東西，

佢乜會煮分屋下人食。

我一生人就單淨堵著恁樣一位

心肝肚全無自家、總下為歸屋下人勞碌轉環(kuanˊ)个婦人家。

這央時，通霄、苑裡海脣出產鯊魚，

當地人將鯊魚肉剁到幼幼，

摎半肥腈(肥仔愛較多兜仔)豬攪肉，

摻兜芹菜、蒜仔、胡椒粉(辣椒仔)……配料

攪勻，續等揉著圓圓，搭著細餅樣仔，

放入平底鑊煎熟，

香噗噗个鯊魚餅就大功告成咧哩！

昨晡日我就摎吾家娘講，

我想食鯊魚餅。

佢交代我，愛同市場一位跛腳哥買，

厥賣个係雙髻仔个(雙髻鯊)較粘饠較好食。

買咧萋魚歸垤，拜託豬肉店頭家摎豬肉共下攪綿綿。

配料摻好又臨時將當多韮菜剁落去，

結果味緒全全無共樣！

啊!

害吾家娘引道嘆：

「貴森森！正無採！」講萋鯊魚當貴。

第二朝晨打早就去市場，

買著一把人家種个幼芹菜摎蒜仔，

任尋賣魚仔个跛腳哥就尋無著。

轉著屋下，

吾家娘講:

[昨晡日愛買蒜仔，你無買!]

[今晡日買有蒜仔， 嗄無鯊魚。]

[做麼个尋無賣魚个? ]  我問佢。

[今晡日起北風咧，漁船無出門哩，

毋可能有擺攤仔賣魚仔啦!]

所得斯加!?  啊離嘎多狗在媽思!  (日語)

                                                                寫於2010/04/15