阿芳心曲

台大"蒲葵道"出去   新生南路就有我愛坐轉屋下个公車

從來就無計劃愛戴在台北。一眨目歇在台北既經過了22年咧!

撿踩我做得無病無痛、會行會走、行動方便88年，該四股个一股就消耗在北台灣之北咧哩！1989民國78年，吾全家在高雄搬上來台北，該央時，吾妹仔正幼稚園大班定定，無想到20零年「咻──」一下就過忒咧！

從來吾緊拼拼仔个性體，見擺出門就喊「它辜西」較趕勢，異無耐心坐公車。這下，退了休，一抹煞生活愛從「儉樸」為原則，漸漸仔心肝乜定疊下來，毋會動啊著就拼拼飆，趕時間像分「螞」咬著共樣。

講斯講，作百項事就愛慢慢仔來，毋使緊張──自家嚇死自家就會定定。成時，乜免不了又緊沖沖仔，心肝頭紮紮，又像會忒樣仔。

這央時，我喊自家：除分地動、山崩、火燒屋、也係海嘯、發大水，逐項事無緊無慢，緩緩仔進行就當做得咧！

故所，出門就提早去坐公車。我本成異怪怨吾戴个民生社區無捷運，這下坐公車嗄慣勢哩！

在公車頂項，可以閉目養神、準備等下愛參加活動个心情，也做得同隔壁坐个人打嘴鼓──有擺，我ㄧ上車，坐在頭前，就大聲胲摎 司機 先生講話，無幾久，後背一儕外省人，捉我來開罵，講麼个我妨礙行車安全，連難聽个三字經就出現。哈！惡馬愛惡人騎，訝nga呾da人愛惡人制──我惦惦知錯，頭那乜毋敢斡過去同佢費失禮，其在分佢罵到悿悿！教精我，在大眾環境裡肚，千萬毋好逞自家个性，想講麼个就講麼个，嗄無顧慮到別儕的立場。承蒙你，這位外省大哥！「您說的事，小女子承教矣！」

公車坐久哎，自然時間就測哎著。車班多个路線根本毋使愁，哪央時就有車枋好坐；較無車枋个，看發車時間推算，八九不離十可以摸到準準，像今晡朝晨去台灣大學辦事，來回就毋使等車──這乜愛靠一息仔運氣來打幫。

係堵毋著車，坐兩腳車，用行也係盡好个運動啊!