吾手指指向潛意識透露:這是終身毋忘个恩人
母女檔:桃園市同安街"夢幻美容店"店主 & 三舅姆
表老妹 & 三個得人惜个子女
除了爺哀，吾一生之中，受到恁多人个照顧，多到像大埤塘个鯽仔──算呀算毋清。
比論講，出世時，吾姆著著熱症(產縟熱)，係無吾婆，就無阿芳仔；高二升高三時，阿爸過身，無心性讀書，係無創叔、香蘭叔姆个照顧，ngaiˇ可能乜無任順利考著大學……其中，吾个阿明舅兩公婆，對吾四姊妹个照顧，ngaiˇ終身毋敢忘。
吾爺仔生前毋肯吾姆去食頭路，厥老古板想法──婦人家就愛戴在屋下，賺錢係男仔人个責任。一直到佢過身前三年，正「拜託」吾姆ten手渡吾秋姑正滿月个倈仔，渡到對歲邊就轉去，有這前例，續等明舅个兩个妹仔請人渡，細个到五、六月大，分人渡到孱孱、胸前漯一隻窟(受到皮包骨)，透日屙痢肚，阿姆高不將接著這隻千斤重个擔頭，阿明舅个兩个妹仔，就對中壢崁仔頂送過頭份二十份來分吾姆渡。民國61年吾爺過身時，小表妹身體還吂好勢，歸日犁屎犁尿，當咂媸！
後來，吾姆渡兩个細人仔，還做手工，同人攣遮仔，連同吾爸撫恤金个利子，咬薑啜醋、食飯摎糖，艱苦過日仔，供應吾四姊妹讀書到大。幾十年來，阿明舅兩公婆在內壢「穩好染印公司」做工，日合夜上班、加班，一隻月正休一日，下來看妹仔，為著愛多賺兩點錢，梅英舅姆還批發糖果、麵包、樹奶糖、菸這兜零嗒，利用工頭工尾賣分同事，恁樣省屎省尿，省自家來成全厥姊歸家大細个溫飽。
ngaiˇ盡記得，考著高雄師範學院，註冊愛自備个被骨、墊被、枕頭、眠帳、包巾……一抹煞係阿舅姆同ngaiˇ款便便！
等ngaiˇ到高雄享受公費个優待，吾姆同老妹、老弟，食著還挷撥，吾老妹前駁仔正講起：佢上新竹女中期間，逐禮拜下課了，單輪就愛行兩、三十分，去舅姆阿爸个屋下，拿佢兜賣伸个菜轉屋下，佢畏得死這件苦事齣，毋過這毋奈何，故所佢發誓愛嫁好額人。
大學期間，放寒、放熱時節，會上去ten手掌小表妹个功課、生活這兜，等ngaiˇ卒業，分到大溪國中教書時節，輒常去山仔頂厥个屋下，佢兩公婆就像吾个第二對爺哀一模一樣。
今年過年，調調去桃園探望兩老，身體無異華麗个明舅，顛倒愛照顧舅姆──舅姆正大ngaiˇ12歲定定！係講佢前世欠ngaiˇ，今生就來還ngaiˇ該……
留言列表
