昨暗晡,我去通霄鎮立游泳池泅水。
禮拜日暗晡時,又正落一陣風馳雨過,故所無麼个人。
一儕佔一隻水道,泅到盡暢樂!
先蝶式慢慢仔暖身;
續等蛙式,不費力,調息又伸懶腰;
接等,捷式緊板遽遽泅;
最尾,仰式漂浮盡輕鬆。
半點鐘~40分鐘邊仔,泅了1000公尺左右,
全身自然鬆爽,
一覺目到天光。
感恩个心,感謝有通霄鎮公所。
(P.S.入場免費,且週週換水;吾台北市立游泳池氯氣消毒過濾循環而已~城鄉差距唷)
今晡朝晨6:40正醒,
結果吾老公,一鑊糜就烳好咧!
我續等接手煮菜。
食飽朝,同吾家娘去逛市場。
一個細阿妹仔賣个綠竹筍盡湛斗~白皙皙幼嫩嫩,
昨晡日禮拜日,菜較貴;今晡日星期一,加異便宜。
一抹煞總買5斤零,正150箍,我拿160箍分佢,
嗄摎佢感謝:承蒙你!恁辛苦種恁好食个竹筍分恩兜享受。
細阿妹仔烏金烏金个面項个笑容,
到這下,我緬著,心肝肚還異燒暖。
自厥爸舊年過身了,伸著佢兩子阿姆種菜種筍過生活。
我盡無愛同這兜可敬个耕田種菜人講價減錢,
毋過,係無討價講價,人又恅著你係脧仔。
全站熱搜