黃哲華原作/阿芳撰寫
在讀小學个時節，正知吾姆係從細，就分阿婆揇過來做心臼仔个，故所，佢做得講，自細到老就在吾黃屋過一生人。
還記得，有一年天旱个冬下時──這係歸年肚耕種人最愁慮个時節，因爭，天旱無水，收成毋好，人就食毋飽，哪顧得投生仔，還愛蓄豬子呢？阿姆還在該煩勞等，係這網豬子無蓄成，歸群大細个讀書註冊就壞蹄咧哩！
冷咻咻个天時，寒到手麻腳痹，係講別人打狗就毋出門，佢乜毋驚浘風雪水，照常擎等钁頭、等畚箕，喊共下去人家收成過个蕃薯田，改蕃薯菇仔，抑係拈人無收淨个蕃薯藤……這兜一抹煞加減好做。
心肝肚項緊愐：「這愛拈到幾時，正有一畚箕？」毋過，看著阿姆頭沉沉仔恁堅心、緊尋緊改，乜刻耐仔煞猛拈，就恁仔兩子哀煞力牯改吔半晝邊，正改著半擔仔定定。該央時，無戴手落、也無鞋著，手腳凍著痹忒，又乜肚枵過背，緊蹻阿姆、摎佢使妮，講：「好吂？愛轉去煮飯咧！」阿姆還共樣頭犁犁仔在該兩隻手無停半下，係講，愛拈一擔，恁仰投生仔、豬仔正有兩日仔好吮，這毋成頭路實在會搣著人屙悿屎、喊毋敢哦！
這央時，分目金金仔看著吾姆有該客家婦人家勤勞省儉、煞猛打拼个性體，為著大細生活，厥个雙手做到濫皮結疤，手指也變形彎忒，做到眼茫鼻花、星光無半夜，歸生人跳上跌落、疲爬極蹶，乜毋識聽佢呻過半聲一句。
等啊等著當晝轉屋食晝咧，阿姆煮好一鑊飯，喊大家來食，該打吔開飯鑊蓋，哪看吔著飯粒？做盡係蕃薯籤！唉！愛仰般吞落胲？阿姆煞煞摎蕃薯籤添在自家个碗肚，留等个就係該一息仔个米飯同蕃薯籤，分俚細人仔食。
續等，講著天旱該央時，陂塘水三股既經伸著一股咧，係講，有搶著水源、加蒔兩坵田，就較有飯食；係無，僅可做得食番薯。故所，阿松叔摎阿偉伯兩儕半夜就去掌水頭，一儕涆水過自家个田肚，一儕續等涆過去，兩儕就恁仰搶來搶去、涆來涆去到天光。
到包尾，兩儕嗄火氣緊來緊大，越吵越大聲，钁頭擎起來，就愛當面削落去樣仔，堵堵在菜園種菜个阿松叔姆看著無站勢仔，係繼續鬧棚下去，斯當毋係搞唷！即靈个佢遽遽拔腳走去喊吾爸來做公當人。
跈等吾爸行到田項，吾爸一開嘴，就話佢兩子叔：「大家就係叔伯兄弟，毋使搣著恁毋好看相！」「年冬毋好，田水無幾多，一儕分一半，蒔兜仔田，伸仔種蕃薯，這冬毋好，望後一冬！」盡包尾佢兩子阿叔看起來，還乜異無歡喜樣仔，圓身一捩，面臭臭仔斡頭就各轉各个屋下去咧！
這央時，阿爸嗄翻仔轉同講：「你愛較煞猛兜仔讀書，看天食飯係異艱苦个事啊！」
2011/7/13阿芳修改
留言列表
