講話學問大
「飯做得亂吃，話做毋得亂講」輒常聽著世大人講這句話，老古人言乜講：「一張嘴，兩層皮。講好講壞做下由在佢」，故所講話係一門講簡單又無恁簡單个藝術。毋過，佢確實係人際溝通當重要个一環哩!
人人會講話──除非啞仔，毋過啊，無一定人人就會講好話。頭擺，戰國策作者劉向講過「唯口，出好，興戎」，係講，講好話做得「玉成好事」，係毋會講話、講毋著話，得失了對方，可能會引起雙方个衝突，造成不可免个遺憾咧！
這擺，吾个家娘發了病，既經入院歸禮拜咧，先生還查毋出麼个原因。佢橫在眠牀項，連著衣就艱苦，全身軟怠怠taiˋ；還引透大氣(一直喘息)，成時忍毋下、堵毋著个時節，正同啕(to)嘆講：「到這位橫欸歸禮拜，醫生還吂同治療，係無係在這醫院等死？」兜做子女个心肚比佢還艱苦，毋過旋旋風嗄無話做得回答佢。尤其，做倈仔个吾老公「艱苦無人知」，又訝膣訝呾在厥脣項問東問西，該就「觸著老爺个腰仔」，惹佢發大譴咧！一忽然間，就親像十五隻土地公放兩片──七土八土，土土土(灰頭土臉、狼狽得很)，其實也知老公个心肝肚項乜有十五隻吊桶──七上八下，摎共樣異無安生，毋知愛仰般正好，這時節，就愛學精兜仔，愛「沉默係金」咧！是非總下因爭愛講話啊，好(hoˋ)講無講，「話到嘴脣留三分」，毋好無顧慮聽者个反應，就單淨自家「溜麵線」講一千擔毋會收束，該斯盡得人惱還得人惱哦！係毋係這央時，愛暫時忍一下、嘴毋好擘開，其實人家乜毋會當你係啞嫲啊！逐擺就恁執性，無開口講一下，就像會死忒樣仔恁艱苦，恁仰就容易得失人，何嘛死苦(何苦來哉)呢？
故所，「話多不如話少，話少不如話巧，話巧不如話好」，在緊要關頭定著愛細心細意，假使輒常無辦法控制自家个kiˇ-mo-ziiˋ，隨時隨口無意中就講出傷人又傷己个話支，該就當無採工咧！
既然講咧歸拖籮哩！自家自愐自話(va，勸告)，乜知愛「從心」改善，修口也修心，這斯無恁該哦！好得身邊个家人做盡包容──嗄陣陣腦上！別儕敢情恁有耐性做吾个「忠實聽眾」無？已食到五十六咧，無遽遽改性，敢做得？
2011/7/13 阿芳修改
留言列表
