阿芳心曲

「221世界母語日台灣動起來」在國父紀念館舉行的頒獎典禮，因野虎登山走春行程，我遲到，入去大會堂既經「中場表演(一)：西遊記外傳  黃世志電視木偶劇團」演出已會忒咧！等閩南語組文學獎頒忒，就係分捱感動著流目汁个「中場表演(二)：客家山歌組曲」由一隻年輕有理想、有抱負个細倈條仔拿等吉他自說、自彈、自唱。佢講，母語个靚摎內涵使人迷戀，佢從細佇新竹峨眉阿婆屋下大，同爺哀待著台北，國、台、客三聲帶攏诶通。

佢先唱一條「老山歌」，字正腔圓、音域雄厚，「嫩竹破篾愛留青，阿哥戀妹趕後生。人生已怨加一歲，黃秧蒔田難轉青！」歌聲嘹喨、扣人心弦！第二首＜屙糟(骯髒)个鞋＞「屙糟个鞋已經久，愐起頭擺行過田脣路，一步一步吂人記得……」就係這下，吾目汁無聽使喚跌下來，佢用母語唱出大自家个心聲。＜種一蕊靚靚个花＞「捱个心肝肚有一丘田，幾久無去耕……」將恩兜个心情唱出，大家聽著盡感動！後尾个安可曲＜目汁含等＞佢摎客語底肚當驕傲特殊个「動詞」表達著淋漓盡致、出神入化！

就像劉榮昌講个：「人生道項，聚散不如人，接受它，放下它！」捱看著恩客家子弟恁優秀，有真多个才能，佢還讀等研究所，前途無限咧！ 祝福劉 先生摎客家鄉親身體健康、萬事如意！

後背客家語頒獎，散文組社會第一名係 張捷明 先生(堵著佢係該日盡大个成就)，第二名 徐翠青先生，佢雙料得獎──短篇小說乜得著第三名。在客家文學這垤園地，恁多各行各業、老嫩大小个客家子弟恁煞猛打拼耕耘，分捱盡多感動，捱乜致上盡多个敬意。承蒙大自家！