阿芳心曲

 阿燿哥翕个 【大直橋夕照】

愛多謝政府開放[鄉土母語]課程，正有好多一份絡食个頭路。毌係講𠊎ngaiˇ無這份收入，就無法度生活；實在係為着自家个興趣同專長做得現學現教，恁樣較好過日仔，這下慣勢咧，喊𠊎ngaiˇ放忒這份工作，顛倒會無結煞毋知仰般安排每日个行踏啊。

  阿燿哥翕个 【東方白鸛】

毋過，乜毋係日日恁順序，過到恁鬆爽。成時，學生仔會打潑賴；會相打比背，可能分對方打著傷；毋聽話，還變鬼變怪......當多想毋着个意外發生咧，還愛費氣去處理。處理毋堵好，無定著導師、教務處還會來囉哩八說，係講驚灶下燒，你就毋好去承領煮菜个工作，全係自家歡喜甘願，怪怨毋得麼人。比將講:前日在一所當[額滿]个國小，佢無提供專門教室，在梯排視聽教室上課，學生仔人數特多，又毋聽話，該日𠊎ngaiˇ精神無已好，天時當熱，學生仔也吵等要求開電扇，實在火著，當想愛罵人，敢做得?等下分細人仔投講[語言暴力]啊。等到最尾下課時節，為着拚掃个事情，又同隔壁自然教室个先生惹着，該後生細妹先生對𠊎大聲咄:

[你不要那麼兇好不好?]黏時發現自家火冒三丈高，故所愛處理好自家个[奇檬子]，無斯鬼就毋會同情你。還盡驚學生仔無趣味，分爺哀壓迫來選課，愛當費氣餳佢來學習。

  阿燿哥翕个【東方白鸛】

親像這兩日在另一所屋脣个國小，毋單止有分𠊎ngaiˇ專用教室，還做得使用電腦，學生仔人數堵好，又當聽話，教起來輕鬆快樂。𠊎ngaiˇ自願下課後培訓客語比賽選手，這本係[你情我願]个事頭。

 阿燿哥翕个【東方白鸛】

今晡日歸日落雨，當晝後天公爺越噭越大棚，放勢牯放大水，朝晨坐公車來，本成愛用兩腳車行轉屋下，可能無法度哦!計畫赴毋着變化，無赴時間該就[落雨天，留客天]，定定仔來啊!

阿燿哥翕个【台北中正橋夕陽】

該下，有位先生拿過來分𠊎ngaiˇ一垤花蓮番薯餅，分享厥花蓮旅行个快樂，ngaiˇ共樣恁歡喜。

  阿燿哥翕个

恁仔細

承蒙你