阿芳心曲

16-03-06(日)

蓮臺山上賞櫻去

大早轉來通霄

老公載厥姆、餔娘、妹仔，總共四儕上

獅潭个蓮臺山欣賞恁靚水紅色个

櫻花，𠊎根本毋識佢，

人講佢安到【昭和櫻】:

蓮臺山頂有一座【妙音淨苑】，

係一位姓廖个居士花了9年零正起到半爛棧仔，

吂[落成]，故所現時一禮拜正開放週休兩日。

這兜櫻花樹種了四年零仔，

同銅鑼九華山个大興善寺比起來，

這位較縮結[小而美]，環境清幽遠離塵俗。

山門外背有大石牯刻等[塵外]兩隻名符其實个大字:

這日，吾家娘精神足，雖然行路無利便也興嘟嘟仔共下出門。

吾妹仔同厥爸一路跈兼厥旁脣，驚怕佢毋堵好會跌着，

好得佛祖有保庇，安全完成了半晝邊个[遶山花]:

  日頭晟等个花當好看。

  兩公婆花前日頭下，情深意還醹

  李花花瓣跌落吾褲頂，詩情畫意。

  崠頂一爿李仔園个李花盛開

該下一路行往上个路脣還種有桂花、含笑這兜，

一陣陣清香鑽入鼻公，實在鬆爽；

歸路仔聽着客家鄉親个客家話乜已親切。 

接等[兵分兩路]:

𠊎同妹仔行大圈；

老周兩子哀dinˊ細圓圈仔。

  滿山淰坑个紅花，在青山綠樹裡肚，親像一幅天公爺畫个【春天到了】。

[春天到，好風光，

花開滿園草也香。

蝶仔為花恁遠來，

花為蝶仔蕊蕊開。]

行忒櫻木花道，接等係一大片个樟仔林，

𠊎兩子哀毋敢行忒遠，

因為吾老公陪哀仔先行近路去陴塘該條細路頂，

做毋得分佢兩子哀等忒久，

遽遽行兼會合。

  誠心个阿姆蹶毋上碫仔，就在下背面對佛祖拜喏。

靚妮妮仔 个 山茶花同頷頷頭，講

正來尞

承蒙你

恁仔細