南庄、獅潭一日遊－阿芳心曲

2010/2/10本成吾老弟應中壢大石門遊覽公司澎澎(彭月英)兩公婆个邀請，特別優待兩日一夜東埔八通關古道健走，夜宿帝綸溫泉旅館，一儕正2100个銀，因為篤篤係過年前兩、三日，日頭乜恁烈，大自家愛拼掃、無心向出去尞，故所招毋著人，一大輛遊覽車正19儕愛去，忍到出發前一日吾老弟正通知取消忒。該阿新叔、阿興仔這兜既經請了假，看著天時也華麗，莫等閒辜負好春光！就相招大家就近去南庄鄉東河村个「碧絡角」看櫻花，尤其「暢遊達人」瑞玲叔姆煞力牯紹介。

9:00集合5台車仔21隻老嫩大小興嘟嘟仔暢樂上山去。

「這下人个觀念愛改過來，無係講到過年正來大拼掃，閒時閒著時就愛掃等來。」共車个春枝叔姆恁樣講。當然咧！時代在改變，頭擺耕種人一年到尾田事拔拔跌，哪有閒工來做閒事呢?我心肚盡感恩吾家娘摎吾老公，佢兩儕成全吾愛搞个性體，年下屋下盡無閒，乜放任我趴趴走，吾老公專工載我當日通霄→頭份來回，因為通霄屋下臨時有事，佢做毋得共下同捱暢樂，聽講佢歸下晝擦淨歸堂屋个窗門，恁好个牽手、點等燈籠乜難尋，我係盡幸福个餔娘人！

在車項打嘴鼓，當遽就到山嵦壁角个「碧絡角」。

一下車就看到紅紅个緋寒櫻(山櫻)開著滿山滿谷，「舊年來个時節，櫻花篤好開當鬧，實在有靚；這下來，感覺開過咧，較無任多花！」瑞玲叔姆批論講，毋過，恩兜看著這青山綠野當中个紅花成林，乜異歡喜！管佢係山櫻(桃紅、單瓣)、千島櫻(粉紅、複瓣？)、大島櫻(純白)，還有一隻半隻个紅杏摎桃花摻著底肚，「數量大就係靚」！

7、8甲个山坡地真闊，路乜當崎，燒暖个日頭當頭曬，行起來盡食力，尤其正佇鬼門關拈起一條命个棟叔，堅耐擎著拄杖仔一步一步慢慢行，「還做得行無？腳會痛無？」異多人關心問，佢回答：「腳掙(肉月旁)痛無相干，心臟無會喘就好。」春枝叔姆佇唇項扶著佢，叔姆一直對阿叔無微不至照顧，尤其這兩年來，做得用「寸步不離、如影隨形」來形容，佢相夫教子公婆恩愛係恩兜後生婦人家个榜樣。