阿芳心曲

山會帶恩轉屋

悼小林村八八水災罹難个一切生靈

在楠梓仙溪溪水頓腳个所在，有一座獻肚山，山中無甲子，流水日月長，毋知過了幾多擺个寒佬熱，淨知朝朝白雲來打粉，山雨來梳妝，彎彎曲曲个河壩水，總係唱等哩哩囉囉低言細語个歌，清風總會在唇口輕輕仔和。

佢還有一個童年个伴，就係對門峎个過溪山，隔等鮮鮮河水，日日共下照鏡、打扮。

山腳下，還有西拉雅个子民，佢兜核到四四角角个屋肚，日時頭出來打獵，暗晡頭轉夜，一屋肚都係笑聲。這搭位秋至滿山多秀色，春來無處不花香，真經係人間仙境世外桃園。

這一日，森林个智者貓頭鵰，企到獻肚山峎頂¹个樹尾上，嗚`!嗚`!嗚`!²喊集合。今晡日，佢湊森林肚个動物開同樂會，這係森林肚盡歡喜个時節，梅花鹿打鼓烏熊吹笛，猴仔跋上樹尾打環車，山歌王樹拐仔，盡聲頦向天聒聒聒，鷂婆、蛇哥、狐狸佬老鼠仔，大大細細个動物，共下唱歌跳舞嘻嘻哈哈。

智者貓頭鵰，人在舞臺頂佬大家同樂，毋過佢還眼精精看等樹尾測風向，大家恁信用佢，佢有責任照顧大家个安全。厥公識教佢，雲轉東毋係雨就係風，這下樹尾有兜仔震動，既經搖起警告旗，一蕊雲緊拼拼仔飛等過，通知莫拉克風搓³就會到這過个消息。

講起風搓，佢係一個魯夫牯，森林肚無人毋驚佢，乜無人講矣佢聽。智者貓頭鵰，見過幾多風合雨，看過幾多水割石，佢知，風來就愛轉竇，水來就愛搬屋?。佢喊大家煞煞好準備，離開水離開燥樹杷，趕緊搬轉穩當个樹頭下，樹頭企得在，就毋驚樹尾做風搓。

風搓天講變就變，第二日，山頂一蕊一蕊个雲飛等過，日頭囥起來，風呼呼呼吹無停。

第三日，樹緊搖雨緊落，堆打堆个雲既經遮忒獻肚山，莫拉克逼近个消息，一聲急過一聲。陣風陣雨、陣光陣暗，風搓真經來到山腳下。

貓頭鵰喊大家毋使驚，恩裡世世代代核到這，做好準備，避開危險，就像往擺个風搓，會雨過天晴。

毋過，這隻莫拉克風搓實在還壞蹄，就因爭受著太平洋熱帶低氣壓个線動，恅著人總係嫌佢性體壞，佢就敢來起戇面，火著來發譴⁴。緊想緊譴，緊想緊譴，從細譴、大譴，到當譴、盡譴，一路挨著神打著佛，從遠遠个大海，戽起滿天大水掃一路過，鵰仔堵著佢種觔斗，樹仔堵著佢打倒麥，屋仔驚到咭咭惇，山豬嚇到戇忒，毋知自家係麼儕。風搓kiam⁵過大海飛過平陽，無人佇仔佢著。來到山个頭前，共樣全無細膩，打潑賴就向山撞過去，還賴等毋走三日三夜。風還毋肯停手，緊喊海龍王不停輸送破記錄个雨水，一千厘米、一千五厘米，再輸送超記錄个雨水，兩千厘米、兩千八厘米，真經係天年倒貶無崁無站。

山像阿姆，恬恬仔承受佢个無理，只有山了解，風搓係一個無人體恤个細人仔，愛人話(va勸)⁶愛人嬌惹。毋過，這擺阿姆既經kaiˊ毋贏⁷，就算鐵打个身體，乜堪毋得風雨个摧殘。無邊風雨情像千軍萬馬打到佢身上，就恁仰，山崩地裂必到千垤萬垤，佬等水變做土石流，經過山窩山壢直直打往下，分水扛去填山腳下个人家，扛去填楠梓仙溪。大大細細走毋掣个動物，只有佬等山腳下个屋，還有失去生命个冤魂，共下搕⁸在烏天暗地个泥粳底，成為歷史个一部份。

走山該下个兩聲嗊嚨響，嚇壞一山个生靈喊皇天。鷂婆佬貓頭鵰，盡聲頦喊講走大水。毋過，地搖山裁風大雨大，頭前既經斷忒路，後背又來變崩崗，有腳無路走，有命閻王硬收留，樹拐仔再仰般向天聒聒聒喊救命，乜喊天天毋應喊地地毋靈。大大細細个動物踵上踵下各各去逃命，走得贏个，食奶个力就拿出來用，走毋贏个只有目金金跈等推山lutˋ 屻⁹埋入楠梓仙溪个河壩底。遠水難救近火，遠親不如近鄰，危急之間鷂婆想救人，一雙腳爪淨抓得起蛇哥，貓頭鵰淨救起老鼠。風雨中煞力牯飛過楠梓仙溪，投靠獻肚山个童年伴-過溪山。

脫忒一層肉个山還係忍等，等待風搓个心情平靜。風搓面對山个溫柔，自家反省自家知差，從盡譴、當譴，到細譴，正放下心肝肚个怒氣同水氣，化做一陣清風，向西天去修行。

雨過天晴心毋晴，鷂婆企在對門个過溪山，看轉心酸舊時地，除了人命財產，麼該就無帶走，除了傷心驚嚇，麼該就無留下，青山剃光頭，獻肚山削忒一半，幾多全家滅口無人噭，隔壁鄰舍賸無幾多家，山腳下个人間天堂既經尋無蹤跡，燒暖个避風港坉到平平平，到如今，流浪个生靈，奈位正係吾屋家?

美不美山中水，親不親故鄉人，卻如今，故鄉水打忒故鄉山，故鄉土坉忒故鄉人，天係有情仰無出手相救?地本有義仰也鬥股傷人?貓頭鵰深深个反省，代代相傳个智慧仰無法度提防風搓？係天機難測，抑係自然既經反覆無常？天公伯做事(sii)真經無人知。

貓頭鵰想起番太祖交代个話:豐收佬傷痛本係倆相連，奇巖勝景崩山起，土石流造就肥分个沖積層。面對多變个大自然，係福係禍無定論，逢兇化吉全在一念間。風搓總係毋照恩个想法行，災難永遠比樂觀還較大。能夠明白這兜道理，番太祖个保佑正會長長久久，這片天地正真經係洞天福地。

貓頭鵰既經明白，天年緊變環境不比當年，氣象異常既經成為常態，災難難提防，既經慣勢个危機更難提防。貓頭鵰想前想後又想起番太祖交代个話，看山勢愛企到高山頂，看歷史還愛頭低低，人企到山个頭前，毋會比蟻公大。故所，佢將目汁捽燥記起教訓，傷口愛趕緊復原，生命做毋得停下腳步，自家堅耐天就會襯手，賸个就等時間熨平傷痛。風搓帶來个雨水既經濕潤了大地，等種籽暴芽揚揲仔飛个時節，貓頭鵰相信，山就會帶恩轉屋。

======================================================================

※註解:

1峎頂：(gien山脊上)

2嗚!嗚!嗚!vu`vu`vu`：貓頭鷹的叫聲 像人在打招呼

3風搓： (fungˊcaiˊ颱風)

4譴： (kienˋ生氣)

5 kiam：過(跨過)

6話： (va勸) 

7 kaiˊ毋贏：挑不動

8搕： (eb`掩埋)

9推山lud` 屻(in)：崩山

======================================================================

【2009 08 08 莫拉克風搓重創南台灣，甲仙鄉小林村獻肚山走山滅村，土石流坉平百零戶庄頭，佬將近五百儕死傷失蹤个人命，佬無數生靈，還搕忒楠梓仙溪，土石流直直推到對門峎(對面山)个過溪山】

作者簡介：

一 認證:

2002 通過 教育部客家母語支援人員認證

2008 通過 客語 <中高級> 認證

2009 通過 客語 <文學類>薪傳師

二 榮譽:

2006第十八屆「臺灣客家文化獎」得主

2008 新竹市客家語兒童文學徵稿比賽

『風中介月光』榮獲成人組小說優等

2008 新竹市客家語兒童文學徵稿比賽

『孫仔買萋魚』榮獲成人組翻譯優等

2008 新竹市客家語兒童文學徵稿比賽

『向日葵』榮獲成人組詩類甲等

2008 新竹市客家語兒童文學徵稿比賽

『八月半介月光愛梳妝』榮獲成人組詩類佳作

2008 新竹市客家語兒童文學徵稿比賽

『一零一大樓』榮獲成人組詩類佳作

2009 國立臺灣文學館 客語新詩 入圍獎

2009 教育部母語創作 客語散文 首獎

三 著作：

2002年 [客家少年]--客家小品、故事、鬥智、演講稿等五十餘篇 (苗栗文化局出版)

2004年 [客家細老鼠同番豆]-客家童話故事 拼音翻譯+CD附拼音解說 (桃園文化局兒童文學協會出版)

2005年 [桃園民間文學]採集:觀音山歌一、觀音山歌二、兩本採集,主角係一百零一歲的人瑞高龍先生 (桃園文化局)

2005年 [桃園民間文學]翻譯編輯:觀音山歌一、觀音山歌二、中壢山歌、平鎮山歌 共四冊  (自組民間文學翻譯團隊 桃園文化局)

2006年 [桃園民間文學]翻譯編輯:龍潭故事一、龍潭故事二、中壢山歌、平鎮山歌 共四冊    (自組民間文學翻譯團隊 桃園文化局)

2009年 [大哥畢个業旅行] 客家少年三 桐花森林个親子童話 (行政院客家委員會核定優良書籍 贊助 華夏書坊出版 )

2009年 [下課十分鐘] 客家少年四 桐花森林个校園童話 (行政院客家委員會核定優良書籍 贊助 華夏書坊出版)

**************************************************************

為孩子創作客文學 傳承客家文化

【劉玟惠.林敬祐/桃園】

由教育部舉辦的台灣閩客語文學獎，將於今天下午頒獎，其中客語散文類第一名，是張捷明的作品 〞山會帶恩轉屋〞。張捷明表示，當初會以客語創作，只是要讓孩子多接觸客家話。經過十幾年下來，不但寫出興趣，也達到當初傳承的目的。

教著女兒用客家話，唸童趣的文字，在紡織廠工作的張捷明，為了教導孩子說客家話，十多年前開始以客語創作兒童文學。

台灣閩客文學獎 散文組第一名 張捷明：「一開始就是為了想教小孩子說客家話，因為小孩大了，才教他們說客家話。他有一個排斥感，人就是這樣，自己會的教，所以我想說，寫一些小故事笑話啦，來講給小孩子聽，就寫，寫幾篇。」

張捷明為了讓孩子多接觸客家話，還讓當時還在唸小學的二女兒，為書畫插畫，藉此多看書中文字。雖然現在已經出社會工作，但她卻一直不知道，這是父親的用心良苦。

去年八八水災過後，張捷明藉著貓頭鷹的眼，看小林村的災難，寫下〞山會帶恩轉屋〞散文作品，拿下客語組第一名，他認為要製造說客家話的環境，讓小孩從聽中學，自然而然地接觸客家話，才能達到傳承的目的。  ( 2010-02-21 )