阿芳心曲

上駁仔吾家官身體無華麗，對6/18入院到今，還待在醫院裡肚，毋過，總算對加護病房轉到普通病房了。

這下，請一個印傭看護照顧，暫時做得敨一下大氣了，衰過吾老公四隻月零無轉台北个屋下——台北屋下樓下大門鎖頭既經換過了，分佢个新鎖匙，佢還吂用過咧！

吾家官也當韌命，四個零月來百三零日倒在病床頂，還煞猛打拼敨等氣，雖然做得敨氣(呼吸)，為著方便抽痰，所以[氣切管]還保留等。

當初，就為著這[氣切管]，吾家娘盡譴吾老公毋聽阿姆个話，分佢頸根挖一個空，到今還在該拖命，增加子女家屬歸家人个負擔。

嗐！當多世事毋係一清二楚，大家就做得了解取得共識个。到今看起來，吾家娘已能夠接受吾家官个現狀了，佢毋會再過憂頭結面，總係怪怨[氣切]這件事，佢講：「時銌袂郜(時候未到)，伊無可能蹬去(回天家)」加上前後兩擺，媽仔娘同伯公廟抽个籤，做下講吾家官會好。這下，吾家娘正經接受了這事實，佢係愐仔開、放仔下，心就鬆爽，就毋會睡毋忒、歸身虐削(如刺在身)，尤其目珠忒傷害，[像針刺等恁艱苦]，佢同我恁仔講。

上禮拜明顯看得出佢回復頭擺个雄頭(活力)，主動會款料理愛來招待米國轉來个滿叔、滿叔姆兩公婆。

天光日舊曆九月二十二，係厥个生日，希望佢做得日日心花開，無愁無慮食到百二。