阿芳心曲

前日11/1禮拜五下晝轉到通霄屋下。

看著吾家娘共樣憂頭結面坐在籐跤椅項，同我講，

吾老公又去大甲醫院看吾家官了！還講：

「伊攏無聽我的嘴，叫伊免恁仔悿，免宕工去，伊嘛照常去；看嘛無較贏，有外勞仔顧就好啊！」

原來，這日11/1吾最大个小娘姑兩公婆抽間來看哀仔；

毋過，我打撞龍無看著佢兩儕。對八月半會面到今，又該半月(一個半月)過忒了，這之間佢兩公婆身體無華麗，一直毋敢去病院看爺仔。

總講吾老公四個老弟、老妹做盡將爺哀个照顧權利放分大哥，仰無想著哀仔乜需要子女三不二時來譫哆，哀仔心肝肚个慍悴無哪仔消，食毋落飯、睡無落覺，略略仔天時起風，佢寒到連雪衣襖婆就上身。我心肚明白，心病愛心藥醫，喜樂个心就係良方妙藥啊!

(上禮拜六，家娘生日，除了我妹仔有轉來同阿媽[生日快樂]，伸个子孫可能毋記得抑毋敢表示，因為吾家娘講佢無生日，毋好做生日。)

今晡食晝時節，我疏失無煮佢愛食个白淨飯──佢一餐食無兩口飯，還有一鍋糙米掺白米飯啊！佢可能無鬆爽，同我講：「今過，我自家煮飯自家食，你兜毋使煮分我食。」等下晝去看家官轉來，佢既經煮好一鍋白淨糜(白稀飯)，唉!胃腸毋好，三餐食粥，敢做得?佢自家歡喜就好，我盡量尊重佢。

兩禮拜前10/20該日，我去桃園食酒，該日佢心情當好，同我講，佢自家煮比印傭較緊板。該暗晡，佢帶等印傭，煮一大圓桌个菜，請米國轉來个六叔+六嬸食夜，還邀請叔伯兄弟、姑表兄弟姊妹共下食便餐。背尾，就聽佢呻該痛這痛，可能寒著，喊佢去看先生，又毋肯，害吾老公就留下來陪佢，無恁輒去醫院同吾家官做復健。好得這臨時印傭已倚勢仔得，逐樣摎吾家官照顧比在加護病房護士照顧个較週到。我老公認為，吾家官現時个狀況，比9月13轉來大甲時節還較湛斗。

毋過，今晡下晝正轉到屋下，就接著醫院打來電話講，建議家屬放棄急救等等，咦！八月半時兄弟姊妹毋係講好咧？！

呵！做人心臼毋好恁愛插事，頭犁犁仔硬做事，無好多講，這係佢兄弟姊妹个爺哀啊！