阿芳心曲

 以上係河濱公園盛開的複瓣木槿 

今晡朝晨，我hong牀了後，當歡喜去公園同好朋友共下做[達摩易筋功]，

接等續等跳排舞，黃教練教兩首~~<真心告白>&<梭羅河畔>。

歸身大汗轉屋下，沖了涼，食咧朝，就遽遽趕去坐公車，一班堵好正行去，

等了十過分正坐上車，去到台北市立大學，公園路側門因為施工關忒，

轉到愛國西路大門，等尋著勤樸樓一樓研習教室，既經赴毋掣半點鐘久。

頭磬磬仔入教室尋後背位仔坐下來，佩服个客語專家學者  徐貴榮博士堵堵講著

[食粢粑搵爌肉味]，好得正食過朝，無斯定著口涎水叭叭跌。

錯過咧佢个【前言】&【客家節慶與米食祭品】

佢提供个

[客家粄十唸]:

頭錐(油錐仔)、二粢(粢粑、麻糬)、三甜粄、四惜圓(粄圓、雪圓、圓粄仔、湯圓)、

五包(菜包、豬籠粄)、六粽(米粽、粄粽、焿粽）、七碗粄(水粄、碗仔粄)、

八摸挲(米篩目)、九層粄(粄條、河粉)、十紅桃(紅粄、紅包仔)。

其他:菜頭粄(蘿蔔糕)、發粄(發粿)、芋粄、糯飯(油飯)、米粉、艾粄。

佢講有關食个諺語:

1.食大垤:吃喪食。

2.食老奶:戀母、想家。

3.食月給:吃頭路、領薪水。

4.食頭路:薪水族。

5.食祿痣:嘴角痣，有食祿。

6.食飯解褲帶，少人一身債:吃八分飽，保平安；多食傷身。

7.食人半斤，也愛還人八兩:禮尚往來。

8.食人个俸祿，功夫愛做足:領人的薪水，盡力多付出。

9.食人碗前，話人碗背:人前人後个一個樣。

10.食人食到出汗，分人食到出目汁:盡量占人便宜，卻吝於分享他人。

11.食茶食著水，交友交著鬼:倒楣，走衰運。

12.食毋窮，著毋窮，打算毋著一世窮:吃穿花費不多，謀畫錯誤就血本無歸。

13.乞食身，皇帝嘴:乞食命、皇帝嘴。

14.交官窮，交鬼死，交著牛販仔食了米:交友要謹慎，交到損友吃弗消。

*-*[講仔就無恁衰，一出門前就踏著牛屎；

    想愛割豬肉，又割著豬朘（zoiˊ)；

    想愛同學老嫲，又同著丈人哀。]

徐博士上禮拜二7/1【客家節慶民族研究】乜講到當精采。

[上元(正月十五)天官賜福；

 中元(正月十五)地官消災；

 下元(十月十五)水官解厄。]

*-*[有妹莫嫁銅鑼圈(關西、龍潭間)，㧡水上崎一晝邊。]

   [有妹莫嫁義民角，毋係㧡稈(挑稻草)，就係挼索(搓草繩)。]

講了先民生活个艱苦。

熱fog fog𤐰𤐰仔个六月天時，在冷氣教室裡背，上恁樣生趣个課程，確實已幸福。

P.S.:今晡日係【小暑】，難怪天時恁熱，一停動就潑大汗。

我母親節5/11電一個虬虬个頭那毛，十人看著九人說，毋過感覺十分熱，

昨晡下晝去泅水仔，感覺這中長个頭那毛無利便，今下晝轉來花兩百個銀去附近

[人人美容院]分姓蔡个新竹芎林男仔人个75歲老師傅剪短咧，啊!

該弄獅狗式个虬毛仔仰無留下半張紀念相片呢?

這下放暑假咧，我感覺十分滿足現下同妹仔快樂過日仔个狀況，

毋過吾老周既經兩個大零月無轉台北來，雖然會思念，

思念就坐火車轉通霄看望家娘同情郎，台灣交通恁利便，無麼个困難个。

前日，初中个同學同厥學生仔交官三灣梨寄送分我一箱，

既在我緊阻擋，佢也詐毋知照常寒天送桶柑、熱天送水梨。

這種大過天个人情，愛仰般回報呢?

個過月以前，跌忒一副老花近視目鏡，痛摸摸仔毋盼得再過配一副。

市場儘採買个非光學鏡片一副100箍个便目鏡，戴起來心肝頭驚驚，

目珠驚怕受傷害，故所今晡日放學後，也去目鏡行配一副目鏡，開2200個銀，

阿姆哀!價數天差地別，也無奈何啊!

總愛促進消費，該當愛分人賺，就毋使牙研目皺痛到摸毋得。哈哈!

承蒙你

恁仔細