開學个第一星期，單淨拜二去上了6節課定定。該日，我本身係初下碼到這學校个[新鮮人]，
前兩節課又係一年生个[新鮮人]，上課鈴仔響起，我緊衝衝仔行去一樓个教室，
分別前8班去渡學生仔，帶到另一棟三樓壁壢角个視聽教室上吾个[客家話四縣腔]个課。
恁樣宕兜仔時間，一節40分就伸忒無已多咧。
第二節課本本一年生後8班个學生仔，好得有一個小朋友个阿姆做得隨班跈讀，做吾个暫時
助教，幫助教室秩序个維護，下課時節還做得渡小朋友轉自家个教室。
阿彌陀佛!毋記得哪央時，我送佢兜轉各儕个教室，正想愛敨一下大氣該時，
在一樓便所脣，忽然間一個細人仔大嫲牯聲噭等對我喊:
[客語老師!我找不到我的教室了。嗚 ......嗚......]恁樣目汁瀾泔盡痛腸个噦噦滾確實嚇著我。
阿母哀!恁費氣个頭路仰般愛來擎?
[一回生，二回熟]，我相信做先生儕自家心肝愛放定疊，
一星期正上一節个快樂[客語]課愛分學生仔有趣味，毋好吂曾至間就壞咧佢學客語个興頭啊!
加油!阿芳姊，你定著使仔得!無問題，定定仔，緩緩仔來，教務處个細阿哥陳組長好參詳。
中秋三連假過了，另外一所較近屋下个國小乜愛開始適應咧!盼望
一切順序好過日
芋禾(芋梗)係頭擺莊下人省儉个菜料，芋頭好食，芋禾也好做菜，拿來析析仔，用薑嫲菣相，加兜仔酸醋，熻到綿綿絡絡。
愛食以前，再過加一息仔炒香个番豆。盡合味，食仔會尋尾。
這番豆先用油炒香，放在細碟仔項，愛食个時節正放在芋禾主菜頂高，正毋會軟軟無口感。
軟軟綿綿个芋禾摎著酥酥脆脆个番豆會放送出最美妙个[味蕾]享受，毋信个話，你做得試看仔啊!
係講買著个芋禾有掛等芋卵(細芋頭)，共下削皮加入去炆到鬆鬆綿綿，還較加有芋仔香、還較餳人食。
這滿，[壢溝屙糟油]事件凸顯出台灣[食在無安全]。除了烏心奸商个良心分狗仔齧忒以外，政府乜有責任，
從上到下个公部門人員，敢有心來為人民生活各事頭來把關稽核?
一日到暗就為著[促統]意題、選舉考量、當官个私人利益定定，敢有好好來為台灣人民福祉來做事?
我對台灣政府个公務人員實在無已好个印象，從上到下沆瀣一氣，細細个台灣就搞到烏煙瘴氣，到底愛怨怪麼儕?
現下遠洋深海大魚仔，講麼个有輻射汙染，吾當多朋友對日本福鳥事件後就毋食魚仔；我屋下單淨無食大隻魚仔定定。
親像上圖个無到支半手指大个[紅魚仔]，一兩也愛10箍，一斤160，毋過有萋就值食，連惱食魚仔个妹仔就食到該片過橫。
恁仔細
承蒙你
留言列表
