阿明的店小憩
白斬雞一小盤；醋悶芋艿、芋梗；梅干爌肉；紅燜茄子；蔥燒豆腐~~~五菜+豆干湯。菜份量少少的，吃得精光![少食多香味，多食無味緒]一大盅的湯上得太慢，大家卻吃不下了。
拜訪無為精舍的敬忠師父
我嘴講當無想愛轉屋下，毋過轉到老屋，看到家娘一儕孤栖孤栖坐在厥特別个交椅頂高，心肝肚又感覺著，八十六歲咧个老人家，還有幾多好光景呢?enˊ乜會漸漸變老，係下擺你老咧，老公做仙去咧，大細係講無愛螔seˇ𥉌dabˋ你，該你自家一個行動無利便个老阿婆，還加又毋識字，正經喊天天不應、喊地地毋聲，愛仰結煞正好呢？家娘就恁有志氣，毋肯勞煩子女，講佢一儕人戴在通霄，自家煮食自家過日仔就好。實際上，佢食睡毋得、歸身痠軟痛，看佢牙研目皺一副恁艱苦个樣仔，做倈仔儕無可能放佢一儕在老屋，電話肚一聽著老哀仔聲音有一息仔爭差，打早就拚轉屋下去看望哀仔。
倈仔一戴歸隻月，老哀仔共樣飯食毋落胲，目睡毋落覺，恬恬坐等無停動也背囊心緊出冷汗，歸身還係軟怠怠仔，倈仔看著毋傪cam勢，遽遽渡去醫院分佢吊大笐gongˇ射，等我拜六轉到屋下，佢正略略仔有神氣同我談哆。體力仰恁差呢？
愐起兩禮拜前，渡佢去三義敬忠師父精舍同東勢小娘姑屋下搞尞一日，該日還邀請彩蓮阿姑同素燕阿嫂做伴共下出門，本成前一日家娘仰膏嗟佢，佢就毋肯答應出門，講佢行路就無力。好得第二日佢心情已好，在阿明个食店食晝，食咧淰淰一碗飯傍五菜一湯，佢食到當合味，下晝頭去到大个小娘姑屋下坐尞一下半就轉來。這星期一過晝，大小娘姑兩公婆也恁有孝轉妹家來看阿姆，前一日9/28家官金斗盎放个通霄公墓[懷恩塔]年度重陽普渡，堵好細个小娘姑兩子哀買低乳糖牛乳三大罐摎一大隻比薩、烰雞翅仔一大盤來轉妹家，enˊ五儕人共下去拜阿爸。祭拜時節，家娘誠心祝禱祈請家官來享用供品。這滿，佢講等舊曆9月9重陽(10/2)敬祖了後，佢愛跈上台北來戴幾日仔。毋過，我絕對無勉強佢定著愛上台北摎共下戴，分佢自家自由選擇，愛歇在哪位隨佢歡喜。我識同佢講，係我係佢，我乜較愛歇在自家熟識个屋下，來台北侷到鳥籠樣仔个公寓，無相識个上家下屋好相借問，幾艱苦知無！
這擺，我有較多時間同佢打嘴鼓，佢又同我講起厥悽慘个童年:佢係大女，阿爸係討海人，阿姆毋惜佢。佢兩三歲就分阿姆送分一個食齋个婦人家。這養姆根本毋惜佢，厥爸成時會揳兜仔魚肉分自家妹仔食，這婦人家毋單淨無分佢食，嗄摎魚肉放在屋樑頂項，驚養女偷食，顛倒摎這爺仔送來个魚肉蓄貓仔。天下最毒婦人心啊!擔名食齋，心肝恁壞，敢有功德？可能家娘同這養姆無緣，到佢七、八歲邊仔，又再過送分通霄周代書个餔娘，做周阿媽个第四個養女。生著靚又肯做事个佢22歲該年，就同周代書第四個倈仔結婚咧。吾老公就係厥長子。
結婚以前，代書阿公60歲過身，滿子(六叔)正四歲定定。結婚了後，阿媽繼續當家，三兄弟戴共下，吾家官後生好賭徼毋顧餔娘大細，故所做餔娘儕盡做恁做，自家老公毋爭志，在大家庭裡背受盡委屈、任勞任怨，從做細妹仔時節一直做毋會滿，兄弟嗄怪怨阿媽寵歹子，講愛分家正毋會分吾家官拖累，阿媽係通霄街仔有名个大善人同人做保了忒一棟樓仔屋，還貌洋菇生理又分人倒錢，了忒幾十萬，高不將[兄弟分爨]，在台灣个四兄弟每房分到四萬到六萬不等个債務，雖然吾家官有分著屋場，毋過所擔个債務同歸家生活所費，做下靠家娘疲爬極蹶舂來个。
分家後，吾家官共樣[賭性堅強、]歸日賭徼對餔娘子女無半滴仔責任，全靠無讀書个家娘一雙手蓄大五個細人仔。包尾，家官著著[洗腰仔]症頭歸十年，最後一年還毋知人事橫在眠床項，難為做餔娘儕，一生人無安無樂受盡厥个屙糟氣。這下，家官做仙滿四個月咧，每日朝晨暗晡點香祭拜，初一、十五，逢年過年還愛三餐扛飯。總感覺 : 家娘一生人生來既係來奉侍家官个。
講到這位，你大體了解一個認命个婦人家个一生人悲情个運命。其他微毛末節个事，有閒我正來講分你聽。
恁仔細!承蒙你!
留言列表
