阿里山龍膽
20140722(二) 天光日[大暑]
麥德姆風搓還吂來到，台灣電視台、啦聚喔鋪天蓋地放送一千擔當得人驚个消息——阿桂姊最關心个就係，風搓吂來青菜先起大價，故所今晡朝晨例行運動後，無插好友相招去食朝，煞煞拚轉屋下洗湯換衫，還同妹仔講[Have a nice day!]送佢去上班，當然免不了聽佢嘀嘀咕咕細細聲抱怨：「有麼个好講个？」就遽遽拚去市場買菜。
呵！妹仔係自家降个、畜个、渡个、養个、教个、育个，這滿兩子哀無已貼心，輒輒分阿桂感覺著，這妹仔為著反對來反對，既經三十歲咧，還遊遊野野無想愛結婚。為著這愛佢結婚來過幸福美滿日仔个事頭，輒常造成兩子哀惹著、無爽快个衝突。阿桂个老公就無像厥餔娘恁盎零、講毋會昏醒，男仔人愐仔開、想過通：愛無愛結婚，愛同麼人戀愛，一抹煞尊重大細自家个主張，通棚毋過問子女个感情問題，根本毋使[愁毋愁，愁該六月天公大日頭]。
愐起當初，阿桂二十六歲就緊拚拚仔抓著一個大好人暈船哩，三十歲以前就[玉成好事]——降好一子一女，完成生養大事咧!這個毋知人我、自私自利个妹仔，一滴就無體諒做阿姆儕 [愛你好] 个心意，講啊著就慶喋喋仔擎：「今這下時代無相同，毋好再過拿頭擺若該時代个老思想，放在吾身項哩！」阿桂當然乜明白係無尋著對褡个細倈仔，也無法度經營一隻幸福美滿个人生啊！毋過，妹仔這種先講先贏个態度分阿桂「啞狗食黃蓮，有苦講毋出」。尤其，該下公園肚跳排舞後，阿芬大嫲牯聲摎佢講，阿芬个單丁一女，台大畢業米國MBA碩士，識在鴻海集團上班，今年3月18正結婚，嫁分八德路[秦媽媽包仔店]个細倈仔，後生兩公婆定居在米國西雅圖，厥婿郎一個月个月給有台灣錢四、五十萬恁多，阿芬還喋喋滾：「這毋係我盡中意个，有一個朋友紹介个好額人，單淨信義計畫區豪宅一間租金六十萬，厥屋下連同忠孝東路有好多間屋贌人，一個月屋稅金就有幾下百萬个，佢無愛，偏偏愛著這細佢兩歲个外省人。」還講佢妹仔愛愛情贏過愛麵包。還喋講，厥且姆說厥妹仔靚過侯佩岑!
阿桂聽入耳公裡背、心肝肚起一葩火，三分歆羨七分發閼，閼做阿姆个自家，做下就係自家个毋著，自家妹仔無教招，怪怨別人毋得！年視年過忒，等靚過旦个青春消失忒，麼个就[被骨店火燒咧——毋使談]哩哟!
再過講，朝晨去市場，擔名愛去買青菜，歸市場看來無幾多[青]啊！問著番薯葉一斤有六十、五十個銀，無買；高麗菜六十五，毋敢出手，包尾問著一斤五十，買哩一隻百七箍，成時乜愛來享受一下[高貴]價數个滋味啊！無買魚、無買肉，單淨買[免洗蛋]兩盒，令果、朳仔兩種果子，三、四樣仔青菜，一千個銀就會下山咧！逐星期二朝晨八點起勢，就有擺攤仔賣山東大饅頭，大嫲牯粒，一粒正十二個銀，買十送一，阿桂十點邊仔到，既經賣忒收攤哩，行過去市場脣[老麵發酵]个店買一粒十八個銀个饅頭，[無魚仔蝦公也好]。
戴台北，食著百項所費有較貴，係講後生人係無屋舍，愛仰般來結婚降子呢？故所，教精大自家，畜大細渡大，斯無包買屋場分佢合降孫仔哟！
毋知這來勢洶洶路線詭譎个麥德姆風搓，臨暗仔來到，會對台灣造成麼个災害無？天佑台灣！
今晡日報紙討論另一個大新聞，就係北捷殺人魔鄭捷被判死刑个冷血過程全多錄。又係一件親子溝通不良，父母管教失衡个個案。天時熱𤐰𤐰，人心不古啊！
大花紫薇
恁仔細
承蒙你
留言列表
