2月25到2月28四連假,我轉去頭份參加陳屋掛紙。單淨觀禮定定,無拿香祭拜,妹仔儕除非圓盆,一般妹家掛紙無分妹仔拜个。我去逗鬧熱,主要想愛同同年伙房个[兒時玩伴]相認,五、六十年無見面,有兜全全喊毋出名仔,過程當生趣,結果非常滿足。
聽着吾大小娘姑兩公婆渡兩個妹仔、婿郎來[轉妹家],食飽晝就緊拚拚仔轉通霄去。毋過226當晝這餐,老人家擎鍋鏟,妹仔、孫女ten手聯合煮來食,因為我兩公婆吂轉到屋下。老家娘一生人煮食慣慣,這下膝頭痛、無法度行去市場買妹仔吩咐愛食个[苑裡魚丸],佢就拜託隔壁个黑寶嬸去買,吩咐買兩斤,佢聽做五斤,害吾小娘姑無結無煞。係講我有在屋下就好啊。
續下來我搣咧兩日,小郎叔姆乜有轉來看老人家,佢食齋,一直就無搭灶下事頭,[習慣成自然],屋下三餐料理就順理成章對老家娘身項跌到大心臼吾个肩頭頂。煮食,本旦就係吾个趣味,難毋着我,毋過在通霄我就當緊張、無輕鬆,因爭有壓力,驚無合家娘个意。
哈!就昨晡日228,我得着家娘个阿𧩣咧------今過做得有自信,輕鬆來煮食咧。
事情係恁樣个:
228朝晨,照常上虎頭山做運動忒,去老周大姑倈仔屋下,堵好倈仔、妹仔倆對公婆愛出門食朝,我跈等去牧場食牛奶。10:30轉來屋下,吾細老弟來電話講,同祥哥倆對公婆,在林口高速公路下南愛來通霄。我煞煞洗米煮飯,11:45佢兜到來,堵好食晝。這下,吾家娘對我比起手指公,阿𧩣我實在慶。
啊!嫁過來30大零年咧,灶下事一抹煞家娘自家包揫揫來做,我完全係分佢寵壞个咧哩!
家娘歲數八十九咧,灶下事頭早就愛放下[交棒]分世細哩。
228係我[重生]个日仔!
我還誠心真意同佢講:
[媽媽!你自家會洗湯、洗衫、食飯這兜,毋使麻煩着世細,這就係大細个福氣。
恁仔細!承蒙你!]
留言列表