阿芳心曲

倈仔今晡日打早轉來台北洽公，下晝兩點鐘轉來，同𠊎整理電腦、平板、手機有个無个問題。𠊎講:

「好久無轉來屋下咧!怕有兩年較多。」

「無恁久啦!九月還會再過轉來。」

佢屋頭屋尾巡一輪，看着廳下外背个冷氣風扇个塑膠網分風吹忒咧；陽台壓克力採光罩面頂个泥沙雜草一抹煞拚淨淨，敢係樓頂个郝先生清个，抑係風搓个[大風吹]到淨俐淨俐?𠊎根本無注意着。(結果係樓頂花錢請人清好，既經兩個月了。)

還去樓下全聯社、較遠巷尾轉角个[蜜世界]巡看啊。發現台北个果子比高雄貴異多。可比講:黃梨一斤39，高雄正20。

「可能係運費个關係。」厥个看法係恁仔。還有屋稅、人事成本......這兜理由。

佢講暗晡頭上下，較涼爽，看佢當悿想愛睡目咧，還係坐夜車下南。𠊎心肝頭有毋盼得，喉嗹空也硬硬。

昨晡日𠊎正對高雄一日來回轉來乜半夜咧!親像有兜歲數个𠊎，就愛坐高鐵毋使省一息半息个所費，該當愛對自家較好兜仔正著。𠊎估算錯誤，認為去大社个餐廳，坐統聯到楠梓較利便。

台北下南時節，車子新沖沖仔，無塞車，四點零10過分就到；高雄上北該下，舊車仔，又歸路塞車，足足六點零正到台北。臨暗仔5:30个車枋，轉到轉運站既經11:30過後，坐計程車到屋下，會12:00咧!一擺就教精𠊎:

恁樣長途坐車定著愛提早打好高鐵个車單，60歲以上也有當多優待折扣，仰這下悿轉來以後正愐着呢?

其實，高鐵同台鐵正係𠊎个首選。