阿芳心曲

繼<快樂个出航>

快樂出海打魚仔，嗄無平安轉屋下个「無常」，

再過同你分享一則<生日係忌日>个「人生」。

108/5/12(日)

同畢業咧20年个學生仔食晝慶祝阿姆節時節，

同阿偉談哆，頭擺佢對泰山「越區就讀」歇厥姑婆屋下。

𠊎講異久無看着厥姑婆咧。

阿偉正同𠊎講，

厥姑婆个大倈仔舊年心肌梗塞發作變做植物人，

橫在醫院歸年咧，還請一個外勞照顧伺候。

故所姑婆歸年傷悲囥在屋下行毋出來。

吾台北个鄰舍阿姊75歲邊仔，降有兩隻當有才情个倈仔，

兩兄弟國中時期成績好盡有名考入建中，係爺哀个驕傲同光榮。

大倈仔台大電機研究所畢業，在外商電子公司做到副總裁，

移民美國討一隻中國心臼有一個妹仔，

離婚後自家轉來內湖分公司上班，

在內湖買有豪宅，

當然每隻月愛付贍養費分前妻。

這幾年美國同台北兩頭來來去去，有交着一位女朋友，

舊年5/13母親節頭一日對美國轉來台北，

第二日愛駛車下台南去女朋友屋下講親。

吂知得啊一上車，心臟病發作送去醫院，

一直就無再過醒過來咧!

5/13母親節係厥个生日，

也係佢無成个講親紀念日，

包尾又係厥个忌日。

5/15打早𠊎上班時節，看着阿姊屋下電火光光，

撳be-luˋ(按電鈴)入去，

啊!阿姊通頭那毛蓬白，瘦到伸一支骨，

佢柔柔仔同𠊎講:

「賜榮既經解脫了」

蛤~~

「佢拖咧歸年，自家選擇生日這日來走。祝福啊!」阿姊講。

除忒[祝福]𠊎無還較的當个言語來安慰。

厥細个倈仔也認堵好對北京公司轉來台北出差。

啊!佢兩兄弟就係天公爺賞賜个麒麟寶貝兒，

厥爸乜心臟病旋旋風70歲邊仔正過身無幾多年，

這下，做老弟儕愛㧡起照顧阿姆个責任咧!