阿芳心曲

昨暗晡瑜珈較慢下課，

加上瓊華同學請大家食朳仔，

轉到屋下6:20，

愛趕6:52區間車去竹南盤車，時間有較逼，

好得吾老仔應答今晡朝晨載我上北。

朝晨6:10邊仔就出門。

天時濛濛亮到漸漸光，

烏雲在天頂走相逐，後背有青天白雲，

實在有靚!

黏時白雲烏雲脣有黃金嵌框樣仔，

日頭出來在雲脣鑲金線仔。

面對這千變萬化个天公个畫布仔，

嘴波嘴擘擘仔感動到講毋出話，

也赴毋掣拿手機來翕相。

日日係好日，時時好心情。

雖然該下上車前分先生咄一下。

當然，毋敢同佢分享當下个美景同感動，

驚怕燒面見厥冷尸胐－－自家討衰(自討沒趣)!

兩公姐到這滿無話講个狀況，

我乜不解!

怪奇啊!

苗栗以南全全無水，

新竹以北落大雨無停，

天公爺無從人願啊!

歸朝晨大大細細雨無煞，

該下第三節一年生學生仔唱

華語版【上學歌】，

改客語版唱:

[天光了，天光了，

雞公喔喔啼。

換好衫啊洗好面，

遽遽上學去。

看着先生行個禮，

講聲先生早；

看着同學牽等手，

講聲你啊好。]

天天過日天天過，

自家快樂自家尋。

毋使看若臭面殼，

我無欠你，你乜係愛較差毋多仔，

係無，若爸吾姆會honghong起來罵。

感恩

祝福