阿芳心曲

每儕人都愛細心細義來維護自家个圓身，係無注意，當容易就會著頭獎發病哟！寒著第四日了，今晡日較習慣鼻公塞塞、鼻澇鼻串个情形。嬌女請假在屋下，老公乜共下在屋下，各人摸各人个事頭，相安無事過了一晝邊。幸福淰淰哟！

拜一、拜二去學校同小朋友共下打拚學習客家話摎客語書寫，雖然鼻澇鼻串已無鬆爽，毋過小朋友已貼心，喊我多休息分佢兜看影片就好，講罔講，還係愛照進度同佢兜復習教過个——無佢兜大部分个學生仔黏時就摎教過个攉vogˋ淨淨，因爭厥屋下爺哀這兜全無同佢兜講客，單淨一禮拜正上40分鐘个[客家話]，係無遽遽復習教過个話語，馬上佢兜就無記得麼个了。常態分配下，當然學生仔有兜較巧，有兜盆頭講到缽，佢乜分毋出a、b、c、d，阿彌陀佛！堵著頭腦鈍鈍又番綻个細人仔，實在頭那痛，較閼乜做毋得發譴到並bin柄biang滾，情緒控管係出差世，一抹煞就壞蹄了！越係市內精華學區个學生仔，成時越難奉待，愛知恩毋係編制裡肚个先生，單淨係教學支援工作人員，係分學生仔、家長投，講你仰般又仰般，黏時就分學校辭頭路，這鐘點費斯末賺，想愛輕鬆賺人兩點錢，無本事斯無恁該絡食，我想再做加兩年，乜愛來蹺腳做阿婆官了！

除了上課負有教學个責任以外，還愛ten手訓練小朋友語文競賽選手个朗讀、演講、字音字形各項比賽，其中艱苦只有行過這過程个先生正知得。先生面對工作个[抗壓性]，同細人仔學習客家話面對壓力个調整——兩頭个取得平衡係當餳我認真投入个原動力，這就係分我个[挑戰]，一生人就愛這企在講台教細人仔个工作。

對小學三年生第一擺寫作文<我的願望>，吾爸同我先預備个稿仔寫等「我希望長大做一個為人師表的老師」起勢起，注定我一生人就單淨會這項頭路定定。這滿叨天之福，還做得同小朋友共下學習成長，除了感恩，還係感恩，在吾平凡勞祿个人生裡肚，因為有恁多親戚朋友、大人細子个牽成，正分我恁多安然自在、康健快樂。

承蒙你！恁仔細！