昨晡日好天時,正一日好光景;今晡日雖然溫度無爭差,毋過雨毛轟(pang)天,感覺也清冷。
昨晡朝晨,ngaiˇ行路當「暖身」去通霄鎮立游泳池泅水,心肝想:大半隻月寒著無停動,就會變大豬嫲一條咧,愛康健,就愛煞猛運動。泅水旦係吾个最愛,故所愛把握時間——朝晨6:00~9:00;下晝4:30~8:30。
去到該位,正知大堀水池無燒水,一個後生細倈條仔自由自在在該水道泅,看到ngaiˇ在細堀燒水池「打水」當運動,佢停下來同ngaiˇ講「水溫只有15度,好冷!」(華語)當時室外溫度11度,後背ngaiˇ也跳入大堀水,唉哉!阿姆哀个硈硈惇,全身像枝仔冰涮著麻痹麻痺,25公尺煞煞蝶式泅過去,遽遽轉頭水道走轉來,跳入溫水SPA窟,正死心摎全部設施搞一遍,蒸氣室焙焙仔正過願,淋浴間个燒水會死會死仔細細管。毋過,嫌罔嫌,至少ngaiˇ有運動到,心情也暢。