幸福美滿，
此事古難全。
昨晡下晝參加同學老公追思禮拜，典禮結束了，還在公車等，吂轉到屋下，接著好朋友个電話，講佢朝晨乜共樣去中山區林森北路个基督長老教會送別她團隊个一個團員老公个[人生个謝幕]。
到這年紀，對周圍親朋个旋風過身，會有感覺，開始思考自家个生死問題。
[人生盡頭全係夢，明日黃花蝶也愁]。
這朋友同我[控訴]厥老公个毋傪人个行踏，我聽了當為吾朋友抱不平。毋過，兩公婆共下生活了三十零年，有麼个冤仇結到恁深呢?
顛倒貶轉來講，係一開始結公婆時節，兩儕就同心協力為自家个新生活打拚，也學習欣賞對方、尊重、了解、照顧、責任，曉得用心學習[愛个藝術]，到這滿雙雙退休了，敢有麼个恁難溝通个?生活歸下無牽掛、無愁慮，該就係兩儕最適當个談情講愛个時節，你講係毋係啊？
何嫲死苦引挖對方个罪狀，恁樣兩人共下生活在一個屋簷下，日日氣噴噴仔，你看佢無順眼，佢看你敢有鬆爽？
同學个老公，前年五月正退休，兩個月後就入院治療大腸癌，包尾還係抵抗不了死神个召喚，終於今年1/13蒙主所愛，訃聞頂高，同學恁講:
「一生六十二載，總係一派簡樸恬淡，
不戚戚於貧賤，不汲汲於富貴，不與人爭利，不計較得失；
面對厥个離開，我們有千般不捨卻不哀傷，
因為佢單淨走忒了佢分內个路，先一步去到主个胸前，
我們終會在天家重逢。
佢最喜歡出國遶尞，相信佢定著在神个身邊俯瞰地泥項个美景。」
雖然，同學講「邀請您用喜樂歡喜心共下來參與吾丈夫人生个謝幕」，毋過，我坐在後背，目汁毋知流忒幾多？
我也愐想著吾爸已過身四十年半了(1972.7.13)。
阿爸个身影——永遠係一位武頓車槌个中年紳士，著等白襯衫摎青卡其工作制服長褲，歸口白淨白淨个牙齒，難得聽著个朗朗笑聲……毋敢再過愐下去了，吾喉嗹空又索緪起來，心焦想愛噭哟。
故所，人間最真善美个就係親情。公婆和捼，自然家庭氣氛美滿，子女就蒙受幸福。謹祝
親愛个親朋好友
全家幸福美滿
留言列表
