阿芳心曲

承蒙吾老公同我掛號，我同台大醫院皮膚科醫生

朱家瑜結了緣，上隻月17頭次去看佢掛43號，今晡朝晨第二擺掛42號，顛倒慢了半點零鐘正看著。下次係3月11兩隻月以後，掛34號，可見皮膚病大部分係慢性病，醫療个過程愛聽醫生个話，盡有耐心來膏藥仔。朱醫生講我愛連續膏半年藥仔。

我9點邊仔就行出門，先去市政府側門看兩禮拜前略略仔開个水紅色蠟梅，正行到信義路101大樓前坐公車到捷運台大站，行到兒醫門診一樓一診等候時節，10點半正28號，21號正進行中，高不將拿出這期《講義》雜誌，看無兩篇就啄目睡。

一棧仔目珠擘金了，脣口一個得人惜个細人仔對等我微微笑，厥公在該聚qi(餵)佢食豆沙饅頭，厥婆在較遠个位所啄目睡。

我同這阿公譫哆起來，原來佢79歲姓湯，苗栗中正路【大南行】文具店个頭家，受日本教育，嗄用當正確標準个國語同厥還吂異會講話2歲半个孫仔講話。

這細孲仔个阿爸係大倈仔，46歲正結婚，毋肯降，做阿爸个用獎金鼓勵結婚摎降子，今年54歲。

今晡日阿公渡孫，打早六點零對苗栗坐火車來台大看先生，阿公&阿婆𢱤sungˋ(推)等嬰兒車，大包細包吊淰淰(掛滿滿)，不辭路遠恁辛苦，全係為著愛孫心!還發現阿公左腳一拐一拐，親像腳骨無利便樣仔。佢本身降兩個倈仔，細个48歲，單身，戴台北。

我兩儕[親不親、故鄉人]就恁樣打嘴鼓了，吂知這細孫仔滿哪仔溜溜行，一個後生人拿一垤[麥克雞塊]分佢，我親像佢拿轉一個毒藥仔，引想愛騙走這炸肉，得著厥婆个認同，我硬對厥手底肚搶走這毒肉，細人仔黏時大聲噭到目汁濫泔，我嗄無結無煞，歸隻[卡棒](包包)貶毋出一個糖仔好來拐恬佢。就這央時，輪到我號碼，連一聲會失禮就吂講出，等我看好拿著藥仔這期間，再無堵著佢祖孫三儕了，敗勢!    祝福 

這阿公心願早日達成

子孫滿堂