阿芳心曲

今年比去年布置活潑溫馨

最右著烏衫者係  蔡校長

台下待命的帥哥

學校老師親手製作大飛機模型  恭祝 一帆風順 鵬程萬里

日仔日隔日、月轉月、年視年過去，

還記得李登輝時代，  台灣錢湮腳目，

該央時 ， 股票上萬點。

每到當晝 ， 行在社區，  人尖人，

餐廳無論大宴小食 ， 一位難求。

經過咧阿扁八年、英九四年國家機器空轉期，

到這枋，

萬物齊漲 ， 就係薪水無起價。

朝晨堵著朋友，

佢有兩個倈仔73&75年次个，

大倈仔食頭路，  細倈仔去米國讀書。

「大个一隻月正賺四萬零銀，蓄自家就毋罅，仰般來結婚?」朋友同我道嘆。

阿姆哀！戴在屋下食爺哀，自家賺自家使，還無才調討餔娘。

該這枋正國小畢業个小朋友，2000年千禧年龍年出生个細龍子、細龍女，輪到當家時節，台灣毋知變到麼个樣?

2012-6-19(二)成德畢業式

打早，阿富翔厥爸同我參詳，參賽字音字形準備事宜。

阿富翔係小五[在校生代表致答詞]十人小組之一，

我講愛同佢翕上台朗誦个相，嗄嘴硬屎胐胖~壞蹄咧!阿芳姊信用破產!

等過了年，富翔牯[畢業生代表致謝詞]時節，我定著無分佢空過。