2011/8/22(一)該臨暗仔，離開了天后宮、韓昌黎祠，去參觀內埔老街。
賞&買老伯母三代經營个[甜酒釀]&[甜酒]後，參觀有彩繪牆壁&地面造景个老屋舍；還有老醫生个屋下。
一個內埔高中老師當靚个白色洋樓前院有一頭開到當鬧个紅蟬花，(常見黃色个[軟枝黃蟬])，昨晡下晝在蕭氏古厝佔地2甲多的蕭家農場後院側角乜看著一頭盡高大个紅蟬花，蕭義雄講，做得用[插枝]就會生，毋過，這位老師講，這綻个細花秧昨晡日正分人挷去種，今晡日無咧，用插可能無會生。算咧!一切隨緣!
天時暗濛濛，還繞去萬巒豬腳街行一輪，真空包裝滷好个[豬卡]，一斤175元，一支三百零~四百左右，一條豬仔單淨兩支前腳(豬手)做得用來滷。續等去【水流東休閒餐廳】食夜，道地[客家菜]，有炒肉、炒豬腸、筍干炆爌肉、雞盤、浮菜(紅菜頭絲&吊菜仔)-----餐廳經理講，南部無出王菩(番瓜)(南瓜)。10過盤菜，食到空盤空碗，經理問還愛加炒高麗菜無?大家喊[毋使]。
等去著【萬金庄天主堂】，既經7:40PM，分咧房間來，【同南部客語教師協會交流座談會】險險就會赴毋掣，佢兜當早就來等等，有兜歇在山林壁角，暗夜騎[歐德拜]無安全，故所緊拼拼仔進行。憑良心講，與會个七、八儕客語先生異優秀，發言當湛斗，可惜體力不足，自朝晨4:30床到21:00，[八得力]已經無電哩!座談會9:40提早結束後，煞煞洗身了，上咧眠床嗄反躁，引睡睡無落覺，實在還艱苦!
个格友來友妹林竹貞主任兩公婆特別來相會。佢擐一大包等路分，當暢恁暢!旋旋風佢倆儕愛轉，無留下來座談。這下，著等林主任親手做个大紅花休閒褲，就會想起韓愈文句:[萍水相逢，盡是他鄉之客]。來友妹，幸會!承蒙你!恁仔細!
林主任个等路
2011/8/23(二)朝晨5:40床，六點邊仔拿房間鎖匙出床門-----這係災難个開始，結果後來又入間拿食朝愛用个筷仔，一念之間想愛打電話分老公，拿了手機嗄摎鎖匙放房肚，等關咧門就壞蹄咧!因為天主堂住宿管理員朝晨9:30正上班，7:00食朝忒，黃小姐帶尋著細神父，佢無備份鎖匙，愛問住持神父-----做彌撒至少還愛半點鐘，情急之下，聽黃小姐建議，從窗門爬入房間。之前，同房个季珊乜試過兩隻窗門，就打毋開，佢無試著側角第三窗啊!感謝聖母瑪利亞!關了一個大門，總還會留等一隻窗門分。這點過零鐘之間，盡承蒙季珊對个安慰&陪伴&照顧。上車前，兩儕入大教堂裡背，感恩祈禱。
[聖母瑪莉亞隨時在若身邊，你有事求佢，定著有求必應。]黃小姐同恁仰講。
正式進行第二日活動:
昨晡日吂遶尞个【五水溝劉家祠堂】【狀元第四合院】
劉姓、鍾姓係萬巒五水溝兩大姓。水頭伯公看仔起讀書人，六堆客家庄出異多博士。
以下有一位頭份鄉親黃森蘭先生當導覽帶路遶美濃~~~
美濃區客家庄43000人口，90%客家人，出316位博士。旗山區學老庄41000人，2000零客家人，兩位出產弓蕉。鳳山區30萬人。
美濃【敬字亭】三級古蹟，每年天穿日有紀念活動，呼籲時下人【惜文敬字】。
美濃路燈由全民認養，一年一人500元。因鎮公所曾積欠台電800零萬電費，除咧本地人，全省同鄉會乜來濟護手。
墓塚式土地公廟三級古蹟，美濃一共3座，單淨一座在路脣。【里社真官-----楹聯:龍 ? 莊 水 ? 口】係水源(頭)(口)伯公。摎一般塚埔無共樣有兩位:碑石頂有紅布條矺等；護欄毋係[封閉式]，有開口分人直接行入去。
對[伯公](土地公)有興趣个朋友，可以參考金竹國小張校長網站:<伯公伯婆>主題網頁。
墓塚式伯公，美濃還有70零位，一般多廟宇式伯公。
經過[朝元禪寺]-----聖嚴法師識在這修行6年。
續等愛去【鍾理和紀念館】，打早就看新聞講，鍾理和哲嗣鍾鐵民先生昨暗晡7:00過身咧，享年70歲。看著佢小學兩年生，就代理厥姆鍾平妹寫信仔，分在台北松山療養院醫治[肺結核]个阿爸鍾理和，用鉛筆仔寫著真靓該字，注定大咧讀師大國文系，做國文老師摎作家。
佢從細小兒麻痺，兩子爺[詏命毋贏]，無幾好命啊!
二樓展示个係台灣當代作家親筆文稿及著作，牆上照片全係男作家，細妹作家，連謝冰瑩、張秀亞、琦君、羅蘭……做盡無像片，有[性別歧視]之嫌。
黃森蘭先生退咧休，正考導遊。佢講:
[人愛繼續創造被利用个價值]，現任【高雄縣導覽協會】總幹事，幽默生趣。佢一路朝晨打嘴鼓:
[有秤就有砣，有公就有婆，有絲炒田螺]；
[朝上無人莫做官，灶下無人莫亂鑽]；
[有妹愛嫁美濃莊，有魚有肉又有湯]；
[老阿婆通客哥，有無就好]。
當晝去美濃東門里民族路3號【合口味餐廳】食晝。老闆係錢復駐美大使期雙橡園主廚陳光仁，確實合味，高麗菜封、冬瓜封，田肚个水中植物福菜，清炒好食，自從毋識食過个。厥店頭个[伴手禮]-----脆雪蔔泡菜、豆腐乳、鳳梨醬、紅麴醬、辣椒醬…….供不應求。
下晝又換一位埔里妹仔、美濃心臼林淑貴來導覽。一陣來頭不細个風馳雨，打壞大家遊興，參觀【中正湖】，【濟南堂】夥房屋，【廣進勝紙傘】，目貼貼仔，將眨起目坐在油紙遮仔店啄一下目。續等參觀【藍衫店】正三分之一下車去看，當然留在車頂睡目，宏盛哥買一領細倈短衫，這擺9/4北市客家社團成果發表會，佢愛做阿嬌姊个倈仔做得著上台。感謝佢兜有心、用心付出、奉獻。
林淑貴講:美濃[黃蝶翠谷]，生態保育無像埔里破壞忒多。美濃每年第二個禮拜日，舉辦[成人祭]穿水橋儀式，呼籲後生人[食水知水頭]，已進行第17年咧!
最尾景點【美濃民俗村】，停跎半點鐘，買等路。買一個細葫蘆摎細kaˊ-banˋ，犒賞自家兩日來个認真遶尞。
車到民間交流道，食咧臨時註文个[豬排燒飯篼]，既經8:00PM，盡承蒙運將白先生，昨暗晡大車入毋得萬金天主堂，佢在車頂掌遊覽車，一夜無睡好，今夜又開夜車。乜承蒙理事長、李社長，還有共下出遊个大自家，有你兜盡好!
承蒙你!
恁仔細!
勞力!
留言列表
