close
過咧星期二,我ㄧ禮拜就天轉笠嫲花──逍遙快樂咧。
雖然講,在小學教小朋友學客語,無麼个壓力,毋過,一日之中面對六個年生,從細到半大細个細人仔,你永遠想毋着哪年生个哪個學生仔,上若客語課時,會變麼个把戲,會有麼个色相?
成時,連自家做先生个心情乜「晴時多雲偶陣雨」,若係心情無華麗个先生,堵着共樣心情大好抑大壞个學生仔,會睛嗙(qiangˊ bongˋ,碰撞)出仰般个事齣呢?故所,多一事,就多加一層愁慮。想愛賺加兩銑xienˋ錢斯無恁胲哦!
日過日,月還月,年視年,講愛來考客家研究所──嘴硬屎胐冇,還係無決絕(giedˋ jiedˋ,決定),ngaiˇ忒會打算盤扚diag來算去做盡算毋合,就將就一日過一日,一週還一週,一月徒tuˇ一月,一年視一年,等到歸頭那毛變白,等到子孫摎你上到家神牌頂高。
P.S. : 四年前寫个老狗屎,這下看來檢討看啊:
在客語教學現時吾最愛个這條過日仔路項,我心肝肚越來越明白,這就係目前盡適合个方式。
我也確實感着自家个成就同尊榮,毋使像初下碼恁樣唉唉嘖嘖,做就著咧。
這學期伸着四隻禮拜个上課,就愛放暑假咧。避暑時節可能還愛負責訓練學生仔[語文競賽]个事頭,甘願做歡喜受。
文章標籤
全站熱搜
留言列表