阿芳心曲

        當久無泅水咧!敢怕停跎有三年邊仔。

前兩日(拜日同拜一)去社區游泳池泅水，該種如魚得水个身體个感覺一下仔全部轉來哩。

我當愛泅水全身放輕鬆，圓身肌骨分佢盡命牯拖長，國語講【伸展】該味緒真[io~doˋ]。

一連兩朝晨有添加運動量，故所暗晡時較好入覺。無斯上星期有幾暗晡我反躁到[失眠]，

睡毋入覺，續同吾老公討咧[短效型]安眠藥餅仔，食咧半粒，睡有三四點鐘正過願。

老咧病痛多，就愛靠平常時自家个照顧同保養。

泅水，喜我最愛个運動方式之一，就愛接等恁仔做下去。

         今晡朝晨坐公車上班。堵堵下咧公車，正企在分隔島公車車牌前等青紅燈愛過大路个時節，

聽着一長聲[啥~~~動~~~~]兩輛歐多拜(機車)橫到十字路口路中央，唉哉!又一件交通事故咧哩。

黏時交通警察兩儕騎歐多拜前來處理。兩個[肇事者]，係後生仔一男一女，後背个細阿哥仔遽遽行兼細阿妹仔脣邊，細阿妹仔坐等一動就毋停動。

毋知這兩位趕緊愛上班个後生人，到底熟識無?若係無熟識，經過咧這擺事故，敢會[擦撞]出麼个[火花]?