阿謙婚宴－阿芳心曲

阿謙係吾滿叔个倈仔，今年5月30舉辦結婚典禮。我兩公婆榮幸，個過月以前就收到紅帖仔，帖仔頂高寫等[全家福]，毋過吾一對子女無閒參加，就吾兩公婆去[五月个牛眼~~~~白核(齕)]因爭佢兜無收親戚个禮。

講着佢這對新人，在美國讀書時節認識交往了五年零，超過2000個日仔，正修成正果。其實，兩三年前enˊ男方頭就有提親想愛早日結婚，細妹頭這片嗄拿[還細]做理由，拖過一年又一年，前年年下仔吾滿叔大腸癌過身，一擋到這下正終生大事完成。係講吾滿叔在現場主婚，該就十全美滿咧。

因為5/30該日佢在頭份迎討舉辦典禮，當晝既經請了親戚，暗餔時就伸台北無幾多我識个親戚，單淨阿秋姑歸屋下大大細細，還有吾細老弟兩公婆ten理事，感覺乜親切有趣味，還有分人客搞[自拍][立可拍]个遊戲，第一擺搞着，現場黏時拿着翕相機翕出來印出來恁靚个相片，當好搞有當值个一個紀念，承蒙小倆口恁周到个設想。

先同秋姑來合照。吾面項个皺痕比阿秋姑較多。