close
今晡朝晨牀，既經6:05咧！人家5:40就開始在公園運動咧，等下去，定著赴毋掣6:20个「拉筋功」，故所我就緩緩仔坐著廳下，想愛來愐想自家个sii-kei-jeoi。
毋過，千不該萬不該，我就不應該開電視，在【HBO】頓惦(dunˋ diamˊ，停留)下來，無頭無尾、無搭無碓看了後背半齣个《蜜月變奏曲》；正摎肥滋滋个圓身從肨凳項屣起。
摎自家準備好合味个朝──菜脯蛋傍燒飯，這無合吾妹仔个意，佢毋肯食，我也無勉強，各人个肚笥各人顧。
好死毋死，兜等一碗飯，又乜行兼電視位，慣勢動作──遙控器一撙，【HBO】堵好演出《吾愛無父》(Dad)，上背我看了下半齣，這下做得補看前面該部分。就恁樣緊食緊看，看了20分鐘就接著哩！毋過，頭前毋知還有幾多無看著咧？
等到生活受到電視等機器个唆(soˊ sungˋ，指使)，實在乜係一種無奈何个悲哀！
還有這駁仔對「枵肚」盡無結煞，暗晡時睡目前，愛豺一肚飽正過願，我這年增加3公斤 ，絕對毋係「天頂跌下來个等路」。
全站熱搜
留言列表
