阿芳心曲

2011/04/02(六)

打早從台北轉通霄，係講照原訂計畫5:30出發，可能做得省儆3擺過路費，乜可以避開塞車路段，會早ㄧ、兩點鐘到屋下。

毋過三宕四宕，臨時等妹仔了牀，又麼个厥肚相(腸胃)無華麗，講無愛跈我兩公婆去東勢食酒──厥表姊定婚，盡好个見習機會。

等到6:30了後，正出門，省了泰山收費站，7:00以前免收費定定。

這四日清明連假，24:00~7:00國道免過路費，為了紓解塞車車潮，乜係政府个德政。

9:00邊仔轉到屋下，可見略略仔有塞車，我ㄧ上車就屈使仔睡，故所塞車無影響吾心情──難為駛車該儕人，一轉著屋，佢又無閒恁多漦漦濞濞大細事情，還同厥爸(吾家倌)洗好身，正正式出門。

通霄到東勢，毋使一點鐘就到咧!還係赴毋掣人家戴金指个儀式，直接去到餐廳，11:20足足等到12:40正開桌食飯。

肚笥既經變背囊咧！第一齣菜就係「雞湯」，異奇考个出菜！續等冷盤有涼拌魚皮、小鮑魚、豬膽肝、豬粉肝、鵝肉、油雞等；當歸枸杞燒明蝦；糖醋麵皮炸透抽&炸海參；毋知名个無鱗魚清蒸；碳烤大片魚肉；細芥藍菜炒生干貝；櫻花蝦油飯……感覺海鮮為主，吾老公坐上橫桌，佢講佢一禮擺拜食个肉類，就無今晡當晝一餐食个恁多！係餐餐恁樣食，腸胃當然堵毋著！

食飽晝又倒轉吾小娘姑屋下歇睏一下，等吾老公酒醒了正轉通霄。

5:30邊仔，吾家倌自家拿冷凍庫个生絞肉煮著半生熟，歸碗公兜等在該食等。遽遽同佢換下來──有包幾支蝦公、伸菜分佢食。

出門前，吾家娘正交代，有盤大麵係想食就微波，係無愛，就去外背買，結果佢自家「愛搞」──這係吾家娘胚想个，佢硬想毋通，做麼个厥老公一生人恁愛「糟蹋」餔娘人？

我看著兩老仔年視年變老，頭腦乜退化異多，心肝當艱苦！有一日，我也會變老……到該央時，係無人眡搭，愛仰結煞?