白絹梅
簾外雨潺潺，滴答聲連綿。羅衿不耐寒流來。
今晡朝晨又係一個又溼又冷个寒天！
承蒙煥表哥的倈仔12/26結婚，兜四姊弟正做得聚總共下暢樂兩日。因為表哥介新親家係台南人，請吾老妹做便謀人，佢正有抽間順續轉妹家，厥家娘過了年86歲，歲數多圓身無已華麗，老人家倚勢吾老妹放尞時節渡佢出去行行遶遶，吾妹家阿姆乜過身兼7年咧！故所捱兩子妹較無像頭擺樣恁輒「轉妹家親像行灶下」咧哩！
吾也共樣，吾爺也已過身37年半，這下捱無爺無哀；毋過，還有家官、家娘「一對寶」需要奉待，係講也還有四個老弟老妹做得互相分工，毋過佢兜一抹煞還愛食頭路，細人仔又吂大，根本無心向照顧爺哀；吾兩公婆係大哥、大嫂，堵好退休，該侍奉爺哀个擔頭就落在吾兩儕身項。
係講退休了後，捱乜盡多微毛末節的漦漦濞濞好摸，故所捱心肝肚當無樂意恁樣無怨嘆、無計較來有孝家官、家娘。「做人个心臼愛知做心臼个道理」，世上已多事情有理講毋清，鑽牛角總係害著自家，捱自家愛自愐自解：無相干，能者多勞，嫁雞隨雞飛，嫁狗隨狗走，嫁著揹家濟仔个就滿山走！捱跈等吾老公行著zogˋ就無毋著(行正就對了)。
昨晡日打早吾兩公婆就渡等吾家娘北上看先生，桃園療養院看精神科 周孫元先生連續處方長間食安眠藥，續等轉民生社區看 林志聖眼科，厥目汁汶到起泡。除這以外，厥皮膚癢症大半年醫無好。
佢係花囤女，一生人老公(吾家官)無爭志，佢為著大細盡堅耐食苦，後生時節愛用鹹草做浦團，一晝邊仔正做好一隻，換著个兩個銀堵好買米煮糜供一家老嫩大細過餐，厥老公歸日仔就味打麻將賭徼。「捱命生正个，前生可能歪事做忒多，今生正恁辛苦。」到這下83歲咧，龍骨動過大手術，背佝佝仔，「骨頭無一時毋會痛，痛著麻痹乜愛忍耐做家內事，該無愛仰結煞?」佢輒常摎捱恁樣講:「做到死，還贏尞到嬾。」到這滿，佢也還愛照顧厥老公。最近(今年3月以來)，吾老公長間歇著通霄老屋陪厥爺哀過日仔。捱當敬佩吾老公恁有孝爺哀，感動以外，愛知進退，做著心臼愛做个責任正著。
捱結婚既經30年，寒暑假抑禮拜六、日常透轉通霄屋下，朝晨頭䟘床煮朝个次數，用兩隻手巴掌个手指來算就罅。因爭結婚第二朝，捱大早䟘起企著灶下，正想愛尋米缸好來量米煮粥，「你恁早䟘床做麼个？後生人好睡，遽上去再過睡，老人家睡癖壞，捱煮就做得。」捱硬硬就分佢寵過橫，到這下續慣勢忒咧！實在敢死就贏人！話係恁樣講，捱心肝頭也無鬆爽，這兩老个奉侍愛到哪央時正了啊？
本成兩公婆退休了後，做得遊山玩水不勝暢樂，堵著這光景，實在「啞仔食黃蓮——有苦難言」！毋過，吾老公盡惜捱，喊捱歇著台北，三不五時轉去就做得，吾倈仔、妹仔出業食頭路耶！捱愛知足，感謝大家个相惜正好。
P.S.2015/01/03補記:
這篇係2009年下仔正開始學寫客語該央時个舊作。
經過咧五年，吾家官在2014/5/31既經過身咧，吾家娘歸身个病痛共樣無人同佢分擔，毋過少咧對家官个愁慮，還有三個妹仔體恤三不二時會來探望，精神加當好，新年新希望，希望天公老大爺保佑佢
食畀營養睡畀飽
食百二生活鬆爽
留言列表
