阿芳心曲

H1N1新流感流行介時節

敢係人類長間無好好來對待地球，這下正有恁多奇奇怪怪介症頭發生？前幾年介「禽流感」、SARS摎最近仔「新流感」，盡多會遰穢(音ce ve 蔓延也)介惡症續等來，分摁兜人試著：這世界歇等淰淰人類介性命受著當大介威脅咧！

「捱」斯無異詳細厥造成介原因，毋過旦勢一息息明白，就係摁哩濫糝食藥仔，成時發病仔，無經過先生處方，就亂食便藥仔，恁仔續搣忒摁圓身項介免疫力，這擺介新流感，尤其特肥介老嫩大細抑係有身姙介婦人家，大會著症發病。

這央時，天時日視日寒，新流感乜跈等遰較遽。報紙頂項寫，當多位介學校介班級就因爭恁樣，故所停止上課，係講學生子著著、遰等去，盡無結煞！所以會影響著細人仔介教育，大自家定著愛細心細意注重這隻議題。

閒時大家愛有正確介生活習慣。比論講：輒常愛用茶箍摎兩隻手洗淨；無麼介重要事情，盡量毋到人多介所在，係講一堆人尖尖揫，口涎水嗙天就當容易遰著病毒。故所該斯你係著著感冒抑發燒介時節，盡量毋愛出門，高不將愛出門，也愛「堷」嘴仔戴等，做毋得一哪仔遊遊野野，同該病毒遰著滿哪仔就係。

總講一句：自家身體愛康健砸磳，哪係有一滴仔無華麗、無鬆爽，就愛遽遽分先生看正做得。圓身係顧好，就毋使驚N1H1咧哩！