阿芳心曲

                                                    

     2009/12/19倪教授告別式

     我和蕭貞都搭乘阿仙夫婦的車10:00及時趕到台中殯儀館懷恩廳。

     廳外擠滿各方賢達，廳內肅穆凝重。

倪教授告別式

該擺，麗芬過身了後，係採基督教追思禮拜介方式進行告別式；七隻月以後，厥老公介告別式由倪家細叔姆主事，交分人本禮儀公司主辦，係一般佛教、道教介方式。場面莊嚴隆重，當多學術團體，中興大學、台大、嘉義大學、屏東大學，還有行政院農委會，台中驗農會、東勢鎮農會……做盡趕來公祭；當然，秀惠摎素霞代表「主婦聯盟」也有來，尤其素霞協助家屬盡多，當該日乜「幐」手招待人客。

「摁」到該下，堵堵家祭做忒，謝媽媽看到阿仙、蕭貞摎「捱」，又噭又喊，阿仙坐著厥唇項盡命牯安慰佢；蕭貞傷悲到講無出話；「捱」想愛翕項，毋過坐佇特壁角，異無利便，乜敗勢企起來，當無結煞。

時間當逼，公祭單位恁多，包尾正輪著「摁」兜儕。在教授靈前一頷頭，「教授！一路好走！」心肝肚恁樣唸等：「麗芬、教授天上比翼雙飛！」好蒠蒠介一隻人忽然間就消忒，「消失在地球上」教授自家講過介。自麗芬走了以後，還吂有抽牽摎佢見面，八月尾仔佢識電話肚拜託「捱」兩公婆去台中看佢，該央時佢跌著，當希望朋友探望，「捱」續恁無情無義無像朋友。這下，仰般再乜看無著佢咧！係講，「捱」會知這結果，半夜乜爬等去啊！

人生親像夢一場，一嗫目就「消失在地球上」，毋論貧富貴賤，有才無才，哪央時閻羅王愛發報道界通告分你，全全按算毋得，故所愛把握在世時節，盡本分、種福田；觀自在、結善緣。恁仔細，承蒙大自家！佇這，祝福大家平安如意！