阿芳心曲

張捷明創作經驗——談少年小說(客語童話)

我當愛參加讀書會，尤其係自家正興頭个客語讀書會。

一連三禮拜聽張捷明先生分享佢十過年來客語寫作个經驗分享。我深深感著一個作家个成功，絕對毋係「天頂跌下來个禮物」，一抹煞就係先天資質摎後天環境造成个。

佢從細戴在公館大山肚裡背，隔壁人正經係隔一座山壁个人。佢講:

「吾公五、六十歲就在屋下渡孫仔尞。我做細人時節，跈吾公去厥同年个屋下尞，厥屋下有《苗友》週刊，裡背當多客家山歌，我盡愛讀。日治時代，日本人盡漢文，街項漢文先生遷徙入山肚教細人仔个童蒙書，吾姆乜盡愛書——吾姐公、阿舅教過吾姆讀書，我會貶拖箱仔看這兜漢文書。」

「客家文字五百年前就有。「幼學仔」(童蒙書)：千字文、百家姓、幼學故事瓊林，還有《四言雜事》這兜。」

「家無讀書子，官從何處來？」

第一日，捷明先生分享厥十空年前寫个《細老鼠摎番豆》。故事創作以厥餔娘同倈仔經老鼠為腳本，用厥公、厥婆同厥姆講个客家語言為準，融入客家情境，用故事生趣做優先考慮，大家緊聽佢唸厥生趣个故事緊笑弛ieˊ弛仔。

第二場:分享兩篇

〈阿明个手〉開場白佢寫等:「愛斯基摩人描述雪，有幾百種詞彙，堪稱雪个民族。客家人開山打林，耕田耕圃，描寫手相關个詞彙乜有幾百種以上，堪稱係手个民族。」這篇創作裡背總共用了兩三百個有關手(指)个動作，十分精彩。比論:「阿明……【攝】起衫袖，【攎】起褲腳，用兩隻手【翻】石頭，翻毋停動:換兩隻手【扐】，扐毋贏；佢跍下去用兩隻手【托】……」

講著enˊ這下會講羅羅合合「鹹菜腔」个台灣个客家人愛增志傳揚客語，無斯後代客家子孫愛從哪位學自家祖公个話呢？頭擺客家俗話有講：「一日毋講朘zoiˊ，食飯毋落胲；一日毋講膣ziiˊ，日頭毋落西。」這種道地烏溜个俗諺這下難得聽著哟！還有「相打毋過田脣——實力相當、半斤八兩」，我無法度體會這句个情境哩。「頭尖尾劣」、「嘴嗷鼻嗷」、「劣logˋ著cog」難搞之義。

「手盤手背就係肉」，還有五個手指个名稱:手指公(姆指)、蛇指頭(食指)、棟指(中指)、蘸藥指(無名指)、手指尾(小指)，再過毋講就會毋記得淨淨啊！

〈無合作个時鐘仔〉見張捷明客家少年文集系列寓言集。用講古不說教，同細人仔講「事愛扛等來做；鼓愛扛等來打」團結合作个道理，利用時針同分針日日在圓圓个運動坪走相逐个形象化來講故事，當餳人讀下去：「星仔橫橫，天河顯顯」，「星光半夜就蹀來車頭」，「知差了，肅恬，啞狗無言無敢聲。」

「天年倒貶——種朳仔打牛眼」，「怙杖仔顛倒怙」，「捉猴入山」當生趣。

第三日分享：〈大哥个畢業旅行〉&〈細老虎堵著年〉

佢講故事做盡合邏輯有道理，前者係佢開車上下時節，聽教育廣播電台該央時，全國中學以下聯合教師會會長林文虎个節目，講著「旅行」議題，當多「天龍國」小朋友扣應入去講佢兜坐飛行機去米國、加拿大……遶尞，佢愐起弱勢鄉下貧苦人家連國小个畢業旅行就有困難，故所寫這篇人窮志不窮，知人我、有家教个細人仔有孝世大人、友愛老弟、老妹个故事，賺人目汁。

我愐起我高中以下三階段个畢業旅行一抹煞毋敢開嘴討愛去个過往，連大一避暑學校「慈幼社」愛去蘭嶼志工服務隊，我也無敢講愛參加。

唯一个畢業旅行係大四个畢業環島九天八夜參訪之旅，恁樣就當值了！

毋過，現下尤其台北天龍國个小朋友，敢有法度了解這篇文章裡背个六年生个大哥無參加學校个畢業旅行，渡等老弟老妹自家安排，三日兩夜畢業旅行个快樂滿足呢？吾小學六年生今晡日正三日兩夜畢業旅行轉來，一儕6500個銀，低收入戶還有補助，人人有好參加，時代無共樣，寫這頭擺背景个故事，堵好分上了年紀个人愐想頭擺个艱苦啊！毋過，在場春香老師、阿嬌老師連聲阿𧩣noˋ寫著恁好。

〈細老虎堵著年〉，推翻年獸惡削形象，改寫過年傳說，呼籲公義社會个建立。

厥故事做下宣揚人性个良善、正面書寫，佢講：「識得麻衣相，撿賤(嫌惡)世間人」，愛人做毋得[以貌取人，失之子羽]。這篇極短篇故事用字搭句，既經到了出神入化个地步，無再一一贅敘，請大家上網尋張捷明寫个10本出版品來教enˊ个後代[知人我，有規矩]。

我本旦係阿明哥个[粉絲]，恁多年從佢學習，嗄吂學著一息撇步，因為各人有各人个專長，無辦法複製厥个[客家魂]。佢係客語文學个國寶，人稱「客語安徒生」，多年佢盡力在客語文學煞猛書寫過參賽，舊年《濛沙煙行過个路》得著台灣母語最高个獎。目前，致力於[有聲書]等華客對照文集傳承。請大家相傳這客語文學界个超級巨星，還愛多多支持來買厥个出版，分佢繼續安心來寫恁多精彩个作品。

承蒙大家，恁仔細!