阿芳心曲

108/1/20(日)歲序大寒  陰午後有雨

昨暗晡緊拚拚仔對高雄轉來台北，接著一通頭擺一兩十年前畢業个學生仔阿爸電話，講厥倈仔(吾學生仔)个妹仔(女兒)小一，乜分𠊎教著客語課。

還暢啊！比中大樂透頭獎還較暢！

這做阿公儕係苗栗銅鑼鄉親，厥妹仔也分𠊎科任教過兩年，倈仔導師班帶仔三年，考上成功高中，討著好餔娘，兩公婆在共隻公司食頭路。厥个妹家爺哀惜妹仔、婿郎親像命甘仔樣，降子無論男女一個補注10萬，細人仔三歲前每個月一儕補注1萬，每年家族外國旅行至少一次，小兩口渡等細人仔也共樣愛每年出國尞一次。講厥倈仔實在有好命！𠊎也共樣想吾這位[高足]命實在有靚，祝福佢一生人平安順序。

這阿爸講，新曆過年前孫女(吾客語學生仔)拿客語課本轉去，正發現我係佢兩子爺的先生，還講厥徠仔阻擋毋好「相認」。哈哈~~毋成𠊎係會食人个老虎嫲？佢在全家人出國遶尞，伸佢一儕在屋下這央時，連打兩日電話分我，堵好我下高雄，佢扡著我搬屋咧。

𠊎同佢「溜麵線」打嘴鼓怕有成點鐘久，知咧盡多該班學生仔个近況，聽咧真歡喜。

enˊ就恁樣變老个！

吾學生仔个妹仔係我這下一年到六年中所有最優質又最認真个學生仔，一對金錫錫親像牛眼核个會講話个目珠同烏溜溜仔个長頭那毛實在係「十人看著十人愛」!今晡日行在天祥个白楊步道同花蓮个砂卡礑步道來回，歸日行咧28764步，最包尾个小椎麓古道短短一截就悿到無力好行咧！歸路程項緊行緊愐這得人惜个細阿妹仔，「巴不得明天就開學能一償心願」！

                                       ～～於花蓮市藍天麗池飯店套房中