close
姊妹就係姊妹,
吾老妹輒輒同我講:
[我就單淨你一個阿姊,
我毋對你好,我愛對麼人好呢?]
故所,佢有麼个好東西,定著會留分我。
一生人伸手接收厥个好料,
罕得我有東西同佢分享。
上禮拜六、日,
難得老妹婿駛車載佢兩子哀共下轉外家。
喊在通霄个我兩公婆過去頭份打嘴鼓,
毋過,堵著家官入院愛醒毋醒个關頭,
我兩儕根本無心性過去譫哆。
單淨拜日該當晝,看了加護病房个家官,
直接載等家娘同妹仔共下轉頭份外家食晝,
停跎無兩點鐘就轉通霄屋下。
當然拿等老妹食著等等連眼霜除皺霜這兜等路轉來。
我想,人生天注定:
吾老妹生來就有[布施]厥手足个情分,
就像吾家官一生人
就愛受厥身邊親人个照顧較多共樣个道理
~~~~萬般就係命。
講著這滿,吾家官三度[水腦]手術,
包尾在台中榮總加護病房戴了會四禮拜了,
拈轉一條命,毋過重器殘障洗腎患者,還過氣切者,需要呼吸照護病床的長照中心正有辦法收留
佢這種慢性病患者个護理。
前兩日跈等吾老公行透苗栗市、苑裡相關護理之家,
心力交瘁以外,還正經想大噭一場,
因爭,一位難求,通棚愛先登記,等待通知。
價數另外毋管,該病房環境實在無理想。
還有,病人个生活品質全全無,
家屬乜還愛盡量[盡人事],
呵!無堵著你實在無辦法理解這人生个生死問題,
正經[經一事,增一智]
?
再講吾老公可能為著煩勞阿爸安置問題,
拜日開始[肋骨下个腹肌抽筋],
痛到愛人命,照X光,連小腸就影響到,
注一管射,拿一星期藥仔,漸漸恢復中。
做餔娘个我,
心肝肚乜親像深井个十五隻水桶~~~~七上八下啊!
全站熱搜
留言列表