阿芳心曲

2013-03-29(五)

今晡日下晝下了課，直接到台北火車頭坐16:15莒光號轉通霄。

可能，掛紙(掃墓)時節，位仔坐淰淰，無麼个空位仔。

車長廣告，有供應鐵路飯包，一個60個銀，吂到一下半時間，又聽著：「很抱歉！飯盒已賣完。」車吂到中壢樣仔，結果吾位仔頭前一位先生同前來收地圾个服務員拜託同佢買三個飯包，黏時同佢回答：「愛等到通霄正同你買，毋係鐵路飯盒，一個60銀，做得無？」OK！

19:00邊仔轉到屋下，食飯，飯碗正放啊下，就同瑞枝叔伯阿姊跈美紗叔伯老弟心臼去跳休閒舞。

通霄老人活動中心二樓場地恁闊，三、四十儕婦人 家跈等 先生婆娑起舞──<非常女>(黃妃唱)，係今暗晡新敎舞曲；<再會吧！港都>、<細妹仔恁靚>、<非愛不可>、<得意的笑>，我通盤無跳過，也有樣學樣跈人扭腰仔停動筋骨，歸身汗流脈落，九點鐘下課了，遽遽洗一盆燒水身，實在鬆爽。

瑞枝阿姊，問我講：「看你跳个樣仔，你完全無跳過

土風舞這兜舞係無？」著！「明眼人」一看就知你有

本等抑無本等，毋過，無相干，「敢去就一擔柴；毋

敢去就屋下愁。」至少，我運動了，我身心快樂就

好。

天光日，周家「掛紙」輪到吾家官第四房做爐主。這

滿有家娘撐等做，下二擺輪到我這輩當家做主，斯愛

擔輸贏正好。