阿芳心曲

校門口警衛室旁的雞蛋花

已有25年以上的樹齡

菜圃茂盛的芋禾

菜圃的守護者  薛警衛  是苗栗大湖鄉親

茄子&黃秋葵正開花結果

瘦薑筋个吊菜仔

肥箍箍仔个吊菜仔

秋葵个花&初果

學期已近尾聲

六年生个6-19(二)就畢業式咧

這班學生仔係我舊年初下碼教[客語]時

最乖巧、機靈、有禮貌、知人我个一班

吂知到這下

有一、二個乜會應嘴應屁

伸兩禮拜兩擺上課

下禮拜正愛摎佢兜[口頭評量]

講正經

一星期正在學校學習一堂課

轉去屋下全全無機會講客語

到國中以上還較無機會講客話

愛復興客家文化

當然從講客語開始

毋過

現實大環境

客家新生代愛能聽、能講自家阿公、阿婆講个話

就係阿婆降子____盡拼!

當晝

我覆在桌面睡當晝

鈴仔聲響咧準備下晝愛開始上課

一個一年生个細阿妹仔走入吾教室

輕輕仔用手指篤吾背囊，軟聲細語講:

[阿芳老師，起床咧!]

[若您還很想睡，可以出去洗把臉哟!]

看著恁得人惜嫩習習个面頰卵

聽著出谷乳燕樣好聽个

雖然係用華語講个幼秀聲音

吾个目睡鬼做盡就分佢趜淨淨

接等下晝兩節

三年生、一年生个課

當順序當歡喜上忒咧

尤其包尾一年生个課

看等[天真無邪]認真專心个五隻面頰卵

分我深深个感動

[就係愛這種心肝肚燒暖个味道]

故所我當珍惜

這[成德]客緣

恁仔細

承蒙你