請觀看http://www.pearstories.org/pears_video.htm
一樣影片百樣情
(海陸腔)張展淇原作
葛膏葛喔！雞公啼哩！一大早一個耕山人，擎一枝梯仔到山項个果 園，凴等 梨仔樹，就蹶上去煞猛摎 熟水个梨仔摘下來，係無，忒過熟就會沷沷跌打爽咧！所以，愛遽遽摘下來。
佢蹶上梯仔摎梨仔一隻一隻扭下來先放在自家著等圍身裙个大袋仔底肚，袋仔淰斯下來，將梨仔盡細義一隻一隻撈出，換放在泥下个大米籮，袋肚撈揫，又蹶上梯頂摘梨仔，下把仔毋堵好無拿核，跌到地泥乜無要緊，原來佢早斯在樹下舖一層禾稈，梨仔跌下來，也毋會靠傷。一遍又一遍，蹶上蹶下，汗流脈落乜悿哩，企等小歇睏一下，在衫袋肚撈出一條花手巾，捽頭先無拿核跌下个梨仔、續等捽汗，捽好將就將手巾仔結在頸根漬汗，又繼續摘。
看到這下，想起頭擺吾爸在莊下老屋耕園實在盡艱辛過日仔。
看佢當煞猛摘梨仔个時節，一個掌羊哥仔牽條羊仔在脣頭過，該條羊仔來去，緊向大米籮可能想食甜梨仔，掌羊哥仔煞煞牽走，羊仔斯盡毋甘願緊捩頭，目勾勾看米籮肚个梨仔。
過了又一個細倈條騎輛自行車在該過，山路異難騎，到樹下乜來尞一下,看著樹下三米籮个梨仔，四向角頭無看著有人，就無臥往上看梯頂樹頂有人無，兜一籮梨仔上車遽遽載等走。
該耕種人一心摘梨仔全毋知歸籮个梨仔，分人偷走。這細倈條仔載等一籮梨仔，一路騎下山，恁堵好一到平路對面來一个當靚个細阿姊，害佢目珠直視直視看到路斯毋看，喔好！壞蹄哩！前輪齕著路脣个石頭，車仔橫落去，歸籮梨仔捨淨淨。阿姆噯！還痛喔！可能堆著異食力，企毋起，看佢坐等挲腳梗。這下有三個好心个後生仔，行過來，牽佢摎車仔扶正，拈梨仔放轉車頂米籮，愛走又摎佢堆著時節，飛當遠个帽仔拈還佢，該細倈條仔就拿籮肚个三隻梨仔，答謝三個後生仔，正上車載等該籮梨仔走。
三個後生仔喫等梨仔一路行上山，也行到該叢梨仔樹，這下耕山人乜摘好下來，咦！仰會少忒一籮，看著這三個後生仔喫等梨仔行過來，手拿个梨仔盡像佢正摘个。結果會仰般﹖下擺有機會正講分你兜聽。這條古係講，毋管做麼个事，俚愛細義。注意脣頭个環境，隨時可能發生个事情，摎自家有關係無。
後記
1.耕種人專心摘梨仔，摘著个梨仔歸籮分人偷走就毋知
這就係:無論做麼个事愛顧頭顧尾。
2.細賊仔看細妹仔，無想自家還騎等車仔續堆著。這就
係講:貪心个人，顧得頭來尾斯翹。
3.記得頭擺，俚客家耕種人,摘高樹頂个果子,全用
(feˋer)→竹篙尾綯等網仔，企在樹下就盡好勢,毋使用梯仔,這就係
客家人个智慧。
(feˋer)→竹篙尾綯等網仔，企在樹下就盡好勢,毋使用梯仔
留言列表
