《刀嫲山風雲》係今年第五屆桐花文學獎客語小說優選(首獎二十萬從缺)，獎金十二萬。
這暗晡enˊ來到惠月、劉楨个錄音室，共下來聽捷明先生講厥刀嫲山个古。佢係當今客語創作坐第一交椅个大師，人尊稱「客語安徒生」，嗄忒謙咧！緊喊在座好友同佢批評指教，聽到𠊎歸身起雞嫲皮。
𠊎連行棋一抹煞[車馬炮]都毋知半滴，莫講這通篇文章恁烏溜个客語，親像老頭擺个[文言文]，當多字墨聽就無聽過，念起來對di對di對du對du，𠊎若係愛同捷明先生擎腳，佢還怕嫌𠊎徑杈咧，故所𠊎企坐難安、毋知愛仰正好。毋過，分在座好友感動，𠊎問捷明先生：
「你細人時節就聽若公這兜人講恁烏溜个客語係無？做麼个平平歇頭份，吾公該時代也無講恁多出口成章个老古人言呢？」
「『禮失求諸野』𠊎細細時節歇在三義、公館交合个刀嫲山(關刀山)深山大山裡背頂，與世隔絕，跈漢文先生學昔時賢文、四言雜字這兜，有言『食飯愛傍，讀書愛講，係毋會講，就讀增廣』，故所從細𠊎就聽老者人恁仰講啊，𠊎單淨就同兒時情景描寫出來定定。」佢回答，又講:
「寫文章定著愛寫出自家真實个感動，文章愛餳人，愛寫出真心啊。」
因爭𠊎毋曉得行棋，做一個忠實讀者个閱讀能力又無罅，故所讀咧包尾毋記得頭前，八千零字个故事个注解136條，做盡附在故事後背翻來覆去，讀起來無利便，這全係讀者个㜮斗。若係𠊎曉得行棋，定著對故事主人翁得福伯同阿妹伯對弈爭輸贏，到歸莊頭莊尾愛合作正做得「圓圓滿滿，天下个事乜地下合煞。」有較深个感動。
親像故事一開始「四月北風水打杈，刀嫲山个天頂陣光陣暗……親像玉皇大帝摎耶穌在天頂爭天下。」著！作者點出人世間，愛相互共生，相爭比背个下場總係穠穠襛襛歸團亂七八糟，該何嫲死苦愛搶光？
作者「吾手寫吾心」，佢寫出厥心肝肚對人世各面向个關懷：自然、天時無常；人間分工合作、行棋相爭；人性刻畫，動植物——雞公打雞嫲，風合雨打爛油桐花……做下恁有莊下味緒。尤其恁烏溜个原汁原味个苗栗腔，讀起來特有搭碓。感佩捷明先生對少年小說盟主提升為成人小說作家——同你賭一個銀，現下小朋友無己多儕讀仔識這篇；這係分大人感動个一篇醒世短篇小說。恭祝捷明先生得首獎，期待還較多
《刀嫲山風雲》再現。
恁仔細
承蒙你
*******************************************************
捷明先生如是說:
這係啀細細五六歲時節，逐擺看大啀十過歲介阿叔，湊厥朋友來屋下行棋介記憶。該央時吾公時時愛去外背打合事業，阿叔吂mangˇ做兵像大號細人仔還當好搞，阿公無在屋家，佢就敢好天落雨就湊伴行棋子，大矣正知愛晴耕雨讀。毋過，該激烈介棋戰，摎毋擔輸贏介種種誇大畫面，啀就記下來矣。
留言列表
