close
三日以前
我在通霄
接著台南老妹个電話
祝我生日快樂
除咧自家个子女會記得若生命中重要个日仔
就伸若姊妹年年毋會毋記得若个生日咧
因爭吾家娘身體毋當華麗
試愐長期來目無足、睡無好
仰般有好心情?
故所這禮拜
係講吾小郎叔正三隻月休假轉一擺來看佢
佢乜頭犁目皺、歡喜毋起來
吾老公渡佢去附近細診所
注一管營養射、拿三日[寒著](感冒)个藥仔
過咧一日
佢嘴講有較好咧
共樣牙研目皺、面臭臭仔
毋過
星期日吾兩公婆就上台北來
吾小郎叔最多乜正陪佢加一日
男仔人敢有感覺到爺哀年視年變老?
這下个老哀仔
確實係同頭擺雄拼拼仔頭犁犁仔做事个阿姆無共樣咧
佢連食飯个胃口就無咧
莫講愛來煮一餐飯分大家食
特別外勞入來照顧吾家官既經第五隻月來
佢一方面道嘆自家毋能力
一方面又痛惜請外勞个費用
加上這隻印尼maˇ實在慶腳
雖然煮个菜無味緒
毋過同吾家官照顧到淨俐、有尊嚴
你不得不佩服厥个本領
毋過
愛仰般來恢復吾家娘个健康快樂呢?
全站熱搜
留言列表