阿芳心曲

                阿姆過身既經十空年咧!我最懊惱个一件事就係 : 佢還生个時節，我吂退休，做毋得陪佢共下打嘴鼓，順續仔從佢學兜仔老古人言還有了解自家屋下个故事這兜一抹煞大細事。

                上駁仔上課，聽翠真先生分享佢同厥姆共下戴、共下生活个微毛末節个甜蜜，分我盡多歆羨同感嘆，我嘛斯無恁好福氣。

                今晡朝晨上小學五年生个客語課，唸着一句[尖(jiamˊ，擠)來尖去]，為着愛教這隻動詞[尖]，我煞猛示範唸這音還解說這詞義兼做動作，結果腦心肚湧起【尖香】這詞彙。

                 可能你有聽過抑無  ? 毋過，我確實已久無聽着[尖香]這詞仔咧。

                頭擺細人時節，吾姆佢間兩年零就降一個，總下降四個大細。我座最大，等降到第三第四隻該下，逐擺在眠床頂睡當晝時節，阿姆一個身正兩片邊脣定定，一片分吊尾錘仔睡，一片乜正一儕有份，仰般就輪毋着大姊我，我座大也毋認份，不時還同老妹、老弟相爭，還輒輒為着這相爭比背分阿姆刻到咒孤罵絕。對我六、七歲子幼嫩還細个心肝肚，這斯係費毋直个大事頭。我試着吾姆惱得死我，佢根本毋惜我，因爭佢還當輒講我係石頭爆个、毋係佢降个，因為我性暴暴仔，通毋通都譴之之仔，無就親像分人欺負當悿噭汁瀾泔。這下愐着頭擺自家恁虐削个性體，敢怕著着[迫害妄想症] ? 發病哦 ! 這症頭還當嚴重哦，影響我半生人恁久怕有，一直到自家做人哀仔诶，[養兒方知父母心]啊!

              阿姆!阿姆!你在天頂看着若戆妹仔這下喉嗹空硬硬愛噭毋得嘴扁，你有麼个愛勸話無?

  多謝  阿燿哥相片。同時一併感謝

    𠊎ngaiˇ係一個當無自信个過時人。對科技產品，尤其電腦連基本操作就驚驚毋敢試看啊。228拜六該日臨晝仔，在頭份妹家屋下，四姊妹除忒我以外，連同下一代个姪仔、吾老公這兜現場就每儕拿等智慧型手機在該「搖啊搖」，互相加入「家族」。細老弟緊搖緊對我講：

「大姊你乜遽遽去搣一隻智慧型手機，恁樣大家聯絡就還較利便。」

「無可能。現時我無可能做『低頭族』，我愛顧吾个目珠。」這係詐講仔。其實，我對自家「搞手機」个能力無麼个才調，又驚「賠了夫人又折兵」——目珠舞壞又了錢。還有一件事，朋友建議我買一隻單眼數位相機，配上微距鏡頭，做得翕出當多滿意个相片，我一直抗拒自家个慾望，拿「目珠花花」來自我安慰，講麼个「投資下去，也研究毋出麼个」，故所好多年過忒，本本共樣用倈仔用到無愛用个翕相機。

     探討做麼个恁仔扭揪，講徹底就係齧察个性體。這敢係省儉成性？成時，我對自家乜當大凱，買自家衫婦、買送人等路、買一千擔無時間看个書……當時衝動買了正感覺差了，毋過，這現象越來越明顯少了。既經年過六十，這條命還伸幾多春秋，還敢愛恁挷擘過日仔？雖然毋使「今朝有酒今朝醉」个麻痺麻痺，也實在無需要省屎省尿个䌈手䌈腳。

    話講轉來，愛仰般按算過日仔，各儕有各儕个主張，總愛維持顧好自家个康健平安，其他閒事一抹煞毋使傷腦筋。

    現下我食睡飽𩜰bid，安然自在，自我感覺幸福美滿，該就罅擺了。

畢業了後食頭路 頭一分工作係在大溪四年，

石門水庫附近乜無已遶尞。

難得今晡日 ，  日頭出心肚就燒暖。(外背溫度11度C)

 阿明的店小憩

 白斬雞一小盤；醋悶芋艿、芋梗；梅干爌肉；紅燜茄子；蔥燒豆腐~~~五菜+豆干湯。菜份量少少的，吃得精光![少食多香味，多食無味緒]一大盅的湯上得太慢，大家卻吃不下了。

 拜訪無為精舍的敬忠師父

        我嘴講當無想愛轉屋下，毋過轉到老屋，看到家娘一儕孤栖孤栖坐在厥特別个交椅頂高，心肝肚又感覺著，八十六歲咧个老人家，還有幾多好光景呢?enˊ乜會漸漸變老，係下擺你老咧，老公做仙去咧，大細係講無愛螔seˇ𥉌dabˋ你，該你自家一個行動無利便个老阿婆，還加又毋識字，正經喊天天不應、喊地地毋聲，愛仰結煞正好呢？家娘就恁有志氣，毋肯勞煩子女，講佢一儕人戴在通霄，自家煮食自家過日仔就好。實際上，佢食睡毋得、歸身痠軟痛，看佢牙研目皺一副恁艱苦个樣仔，做倈仔儕無可能放佢一儕在老屋，電話肚一聽著老哀仔聲音有一息仔爭差，打早就拚轉屋下去看望哀仔。

         倈仔一戴歸隻月，老哀仔共樣飯食毋落胲，目睡毋落覺，恬恬坐等無停動也背囊心緊出冷汗，歸身還係軟怠怠仔，倈仔看著毋傪cam勢，遽遽渡去醫院分佢吊大笐gongˇ射，等我拜六轉到屋下，佢正略略仔有神氣同我談哆。體力仰恁差呢？

        愐起兩禮拜前，渡佢去三義敬忠師父精舍同東勢小娘姑屋下搞尞一日，該日還邀請彩蓮阿姑同素燕阿嫂做伴共下出門，本成前一日家娘仰膏嗟佢，佢就毋肯答應出門，講佢行路就無力。好得第二日佢心情已好，在阿明个食店食晝，食咧淰淰一碗飯傍五菜一湯，佢食到當合味，下晝頭去到大个小娘姑屋下坐尞一下半就轉來。這星期一過晝，大小娘姑兩公婆也恁有孝轉妹家來看阿姆，前一日9/28家官金斗盎放个通霄公墓[懷恩塔]年度重陽普渡，堵好細个小娘姑兩子哀買低乳糖牛乳三大罐摎一大隻比薩、烰雞翅仔一大盤來轉妹家，enˊ五儕人共下去拜阿爸。祭拜時節，家娘誠心祝禱祈請家官來享用供品。這滿，佢講等舊曆9月9重陽(10/2)敬祖了後，佢愛跈上台北來戴幾日仔。毋過，我絕對無勉強佢定著愛上台北摎共下戴，分佢自家自由選擇，愛歇在哪位隨佢歡喜。我識同佢講，係我係佢，我乜較愛歇在自家熟識个屋下，來台北侷到鳥籠樣仔个公寓，無相識个上家下屋好相借問，幾艱苦知無！

 阿里山龍膽

20140722(二) 天光日[大暑]

麥德姆風搓還吂來到，台灣電視台、啦聚喔鋪天蓋地放送一千擔當得人驚个消息——阿桂姊最關心个就係，風搓吂來青菜先起大價，故所今晡朝晨例行運動後，無插好友相招去食朝，煞煞拚轉屋下洗湯換衫，還同妹仔講[Have a nice day!]送佢去上班，當然免不了聽佢嘀嘀咕咕細細聲抱怨：「有麼个好講个？」就遽遽拚去市場買菜。

呵！妹仔係自家降个、畜个、渡个、養个、教个、育个，這滿兩子哀無已貼心，輒輒分阿桂感覺著，這妹仔為著反對來反對，既經三十歲咧，還遊遊野野無想愛結婚。為著這愛佢結婚來過幸福美滿日仔个事頭，輒常造成兩子哀惹著、無爽快个衝突。阿桂个老公就無像厥餔娘恁盎零、講毋會昏醒，男仔人愐仔開、想過通：愛無愛結婚，愛同麼人戀愛，一抹煞尊重大細自家个主張，通棚毋過問子女个感情問題，根本毋使[愁毋愁，愁該六月天公大日頭]。

愐起當初，阿桂二十六歲就緊拚拚仔抓著一個大好人暈船哩，三十歲以前就[玉成好事]——降好一子一女，完成生養大事咧!這個毋知人我、自私自利个妹仔，一滴就無體諒做阿姆儕 [愛你好] 个心意，講啊著就慶喋喋仔擎：「今這下時代無相同，毋好再過拿頭擺若該時代个老思想，放在吾身項哩！」阿桂當然乜明白係無尋著對褡个細倈仔，也無法度經營一隻幸福美滿个人生啊！毋過，妹仔這種先講先贏个態度分阿桂「啞狗食黃蓮，有苦講毋出」。尤其，該下公園肚跳排舞後，阿芬大嫲牯聲摎佢講，阿芬个單丁一女，台大畢業米國MBA碩士，識在鴻海集團上班，今年3月18正結婚，嫁分八德路[秦媽媽包仔店]个細倈仔，後生兩公婆定居在米國西雅圖，厥婿郎一個月个月給有台灣錢四、五十萬恁多，阿芬還喋喋滾：「這毋係我盡中意个，有一個朋友紹介个好額人，單淨信義計畫區豪宅一間租金六十萬，厥屋下連同忠孝東路有好多間屋贌人，一個月屋稅金就有幾下百萬个，佢無愛，偏偏愛著這細佢兩歲个外省人。」還講佢妹仔愛愛情贏過愛麵包。還喋講，厥且姆說厥妹仔靚過侯佩岑!

阿桂聽入耳公裡背、心肝肚起一葩火，三分歆羨七分發閼，閼做阿姆个自家，做下就係自家个毋著，自家妹仔無教招，怪怨別人毋得！年視年過忒，等靚過旦个青春消失忒，麼个就[被骨店火燒咧——毋使談]哩哟!

再過講，朝晨去市場，擔名愛去買青菜，歸市場看來無幾多[青]啊！問著番薯葉一斤有六十、五十個銀，無買；高麗菜六十五，毋敢出手，包尾問著一斤五十，買哩一隻百七箍，成時乜愛來享受一下[高貴]價數个滋味啊！無買魚、無買肉，單淨買[免洗蛋]兩盒，令果、朳仔兩種果子，三、四樣仔青菜，一千個銀就會下山咧！逐星期二朝晨八點起勢，就有擺攤仔賣山東大饅頭，大嫲牯粒，一粒正十二個銀，買十送一，阿桂十點邊仔到，既經賣忒收攤哩，行過去市場脣[老麵發酵]个店買一粒十八個銀个饅頭，[無魚仔蝦公也好]。

戴台北，食著百項所費有較貴，係講後生人係無屋舍，愛仰般來結婚降子呢？故所，教精大自家，畜大細渡大，斯無包買屋場分佢合降孫仔哟！

每儕人都愛細心細義來維護自家个圓身，係無注意，當容易就會著頭獎發病哟！寒著第四日了，今晡日較習慣鼻公塞塞、鼻澇鼻串个情形。嬌女請假在屋下，老公乜共下在屋下，各人摸各人个事頭，相安無事過了一晝邊。幸福淰淰哟！

拜一、拜二去學校同小朋友共下打拚學習客家話摎客語書寫，雖然鼻澇鼻串已無鬆爽，毋過小朋友已貼心，喊我多休息分佢兜看影片就好，講罔講，還係愛照進度同佢兜復習教過个——無佢兜大部分个學生仔黏時就摎教過个攉vogˋ淨淨，因爭厥屋下爺哀這兜全無同佢兜講客，單淨一禮拜正上40分鐘个[客家話]，係無遽遽復習教過个話語，馬上佢兜就無記得麼个了。常態分配下，當然學生仔有兜較巧，有兜盆頭講到缽，佢乜分毋出a、b、c、d，阿彌陀佛！堵著頭腦鈍鈍又番綻个細人仔，實在頭那痛，較閼乜做毋得發譴到並bin柄biang滾，情緒控管係出差世，一抹煞就壞蹄了！越係市內精華學區个學生仔，成時越難奉待，愛知恩毋係編制裡肚个先生，單淨係教學支援工作人員，係分學生仔、家長投，講你仰般又仰般，黏時就分學校辭頭路，這鐘點費斯末賺，想愛輕鬆賺人兩點錢，無本事斯無恁該絡食，我想再做加兩年，乜愛來蹺腳做阿婆官了！

除了上課負有教學个責任以外，還愛ten手訓練小朋友語文競賽選手个朗讀、演講、字音字形各項比賽，其中艱苦只有行過這過程个先生正知得。先生面對工作个[抗壓性]，同細人仔學習客家話面對壓力个調整——兩頭个取得平衡係當餳我認真投入个原動力，這就係分我个[挑戰]，一生人就愛這企在講台教細人仔个工作。

對小學三年生第一擺寫作文<我的願望>，吾爸同我先預備个稿仔寫等「我希望長大做一個為人師表的老師」起勢起，注定我一生人就單淨會這項頭路定定。這滿叨天之福，還做得同小朋友共下學習成長，除了感恩，還係感恩，在吾平凡勞祿个人生裡肚，因為有恁多親戚朋友、大人細子个牽成，正分我恁多安然自在、康健快樂。

承蒙你！恁仔細！

今晡日過到當暢樂。感謝脣頭恁多好友个互相關心問好。首先感謝好友格友，尤其校長liuting个分享，佢翕出恁多恁靚个花花草草摎昆蟲禽鳥，分大家看到心花開。

我臨晝仔去市場捎菜尾，買著已多便宜又值食个果子、青菜摎魚魚肉肉，比將講一盒80個銀个枇杷，正賣50箍，一百箍買兩盒，買到暢奓da奓，比進前正出个時節還較甜——當然我做毋得無限制齔一肚飽。

食飽晝，擇菜、晾菜，還蒸兩隻剝骨个雞髀，嗄蒸過橫火燒鑊，毋過看了阿均頭在F.B.分享个文章，我歸下晝心情恁好，等下又愛去[北市客家藝文中心]聽張捷明大師演講，有關厥客語創作个心路歷程。

恁樣个人生，正經愛珍惜，感謝天，感謝地，感謝吾爸同吾姆。還愛感謝吾家官、家娘同老公，分我相當个民主自由，做得遊遊野野做自家。

以下分享 錢鴻鈞先生，清華物理博士，現任真理大學台文系教授个真性情大作:

題目:      崖屌佢妹正好个中華民國教育           

該日兩公婆各儕騎各輛自行車，享受雙隻輪仔輾在基隆河河壩脣个大路項个安然自在。歸路雲淡風輕心情暢樂，三不二時看著路脣紅羅花色野草花，佢會恁樣訄洗我:

「細黃花，有大細蕊；大紅花，乜有大細蕊；親像兩儕有大隻有細粒，生來無平大。」確實，Size、種草一抹煞無共樣个兩儕人，就恁有緣共下歇在一間狹膣狹極个屋下恁天長月久了。

行到圓山中央廣播電台附近，佢先在苦楝樹下凳仔坐下來等我，等我行兼，佢黏時企起來想愛離開，講當多蚊筍仔(小黑蚊)在齧佢，佢強強會分這群看毋著个細轟炸飛行機進攻到堵毋著。係乜——這就係兩儕體質个大無相同，平平共下企坐等，蚊仔單淨愛灂厥血，無愛吾个。

一路哩來，幾多親戚無看好个婚姻，恁樣驚驚險險、吵吵鬧鬧，經過了三十零年來，到了這站仔，無神氣再過好來呯呯滾，正起勢有一滴仔愛有一息仔戀个感覺。

2014-03-29(六)

青年節，現下既經無人記得恁仔个一個國定紀念放尞日了。

昨晡臨暗仔香香阿妹先生同我送來一疊【文學客家】第16期个稿仔來分我校對。

佢前腳正行仔走，吾倈仔後腳就拉等to-lang-gu轉屋下來，害我本成愛去寶島電台參加三月分个黃金讀書會嗄黏時喊[卡]，因為倈仔難得轉來，煞煞打電話同主席惠月摎會長劉楨會失禮，煞煞開火灶煮暗餐，難得倈仔肯在屋下食夜啊。妹仔雖然較暗兜仔八點零正轉屋下，歸屋下人共下打嘴鼓，也做得彌補連續兩隻月吾去黃金會个遺憾了。

朝晨，我共樣去公園做氣功，毋過該兜阿姊單淨梅子姊一儕來，其他講去參加里長主辦个花東兩日遊了。梅子阿姊噥噥噥噥同我講一千擔厥身體个無鬆爽摎公園脣一家陳伯伯个家內事，包尾我同佢安慰:

[放輕鬆!毋使煩勞，毋使自家嚇自家，食睡不安。]講罔講，假使一個人，食無落飯、睡毋落覺、屙毋出屎尿，歸日頭慇腦疺、兩腳無力，該比死忒還過苦。

我心情已好，花300個銀買了一盆[君子蘭]放在窗門脣。

當晝煮了一鑊va-sa-ba(虱目魚柳)&蚵仔為主个海鮮粥，同朝晨个燒餅這兜餅仔，四儕人歡喜過一餐，歸日我頭磬磬仔在看吾文稿，吾老公講，恁宕工个頭路你仰恁愛?

本文引用自keich88 - 內灣老街

感恩 出外人引發我對 北市永樂國小退休的客家鄉親

劉興欽老師的一則講演記錄~~~時光匆匆，2010年，一晃即逝。

劉興欽博士，一生從事發明，專利無限。他的點子靈感打從哪兒來?

請看 四年前我的報導:

• 千斤力不如妙點仔

主講者：「發明大王」 劉興欽 博士

ngaiˇ盡敬愛个先生係吾婆。

ngaiˇ出世个時節，吾婆正46歲，該下吾姆著著熱症(產褥熱)，發燒燒過40度，險險消忒，故所ngaiˇ對一出世就係吾婆歸手渡大个。

ngaiˇ還細个時節，逐擺兩子阿婆共下逛街，人家輒常問佢：「阿菊嫂！你哪央時降个這隻滿女仔呢？還得人惜哦！該鼻公恁竳、目珠雙瞼過大蕊，精頭精面樣仔，摎你親像粄印印仔印出來一模一樣，一滴仔就無爭差。」吾婆聽著，笑到牙唽唽、暢喋喋仔。這下ngaiˇ愐著這兜頭擺个事，心肝肚試著已燒暖。

阿婆个身裝細粒細粒仔，做事當遽板煞手。無論田頭園尾、灶頭鑊尾、針頭線尾个功夫，上家下屋無一個婦人家比佢還過慶。吾婆降五對、總共十隻大細，滿叔正大ngaiˇ七歲定定，通棚愛倚恃吾公小學校長个月給過日仔、繳學金，當挷撥無鬆融，做下就倚靠吾婆一雙手勤儉做家。佢蓄豬嫲子，一綱豬子十空隻賣著个錢銀毋罅拆細人仔个註冊費；該下吾爸摎吾叔乜既經食月給了，旦勢還愛供各儕个餔娘大細，做得分爺哀打幫，照顧老弟、老妹當有限哦！

吾公係一位幼秀斯文个教書先生，田項个頭路罅無底、半項無會，蒔田、挲草同割禾一抹煞吾婆貌淨淨；工頭工尾還愛摸菜園種菜，屋下个青菜旦勢自家生產，冬下時節曬鹹淡，菜脯乾、覆菜、鹹菜乾這兜微毛末節个事頭，這下愐想轉來，做盡係吾童年難忘个印象，因爭細人仔乜加減愛ten手踏鹹菜、曬鹹淡、揰鹹菜落盎，這兜ngaiˇ通體識摸過，「兒童未解躬耕事，也傍桑陰學種瓜」；毋過這下个細人仔做盡「 三兩重就毋使動」咧哩！

逐日朝晨吾婆一䟘牀，就先去雞棲、鴨寮、豬欄下餵頭牲、拚掃，續等就擎等钁頭去菜園煞猛改菜地，一直到臨晝邊仔日頭當烈个時節，佢正有轉屋。臨暗仔共樣个頭路，印象中佢輒常到屋下逐個間房項收揫尿桶个尿水好淋菜，逐擺摸到斷烏無半夜，歸身仔濕濕潦潦，正有轉屋下來。

過年過節舂粢打粄歸下仔包揫自家做：蒸甜粄、打菜包、䌈粽仔、印紅粄、挼粄圓、舂粢粑做下毋使求人。係講堵著隔壁鄰舍做好事抑係做壞事个時節，佢總係分人拜託擎大鑊鏟做總舖師个不二人選哩！還有佢當會做細妹仔个大衿衫同細倈仔著个唐裝，佢盤个鈕孔竳線伶俐，無人當仔過佢咧！講佢係「千手觀音娘」一息仔就無爭差哦。

從細ngaiˇ就兼身跈等吾婆，看著佢仰般堅耐過日仔，等到自己結婚降子了後，係堵著艱苦毋結煞該央時，就會愐著吾婆，假使講ngaiˇ今哺日做得過等天轉笠嫲花——安然自在个日仔，大體係受吾婆个影響，吾婆就係ngaiˇ這生人最敬佩个先生。

逐禮拜三同拜四就係我最快樂个日仔。

昨晡日12/12(四)打早就去公園做達摩易筋功，我當煞猛盡命牯停動，無一下半仔就歸身燒熝熝、還出汗，成時汗答答答跌，歸面洗一遍，這係天然个面油，分你好氣色。自從我立志朝晨愛運動，三隻月以來身體改善當多，我定著愛繼續[活動]下去。

會做忒時節，吾同事好朋友Call我，去冷水坑行行兼洗湯，這難得个機會，顧不得10:00起有一場[北市婦女寫作協會]个講演愛聽，先去再過講。

恩兩儕先[摩斯漢堡] 食了朝，行了半點零鐘路，就入去[冷水坑]女湯，今晡日冷咻咻，人無已多，毋過接等入來个大姑小姊，也同細細仔个水池擠淰淰，因爭這係開放毋使錢个原因。

20130821(三)七月半  潭美颱風來攪局

朝晨五點邊仔，吾兩公婆就牀，無閒「拜阿公婆」个頭路。

我在灶下「煮碗」，齋个、葷个至少愛有六碗。七點半兜上三樓「公嬤廳」，先用敬果、齋碗拜佛祖；點過鐘了，神桌徙在阿公婆這片，續等排好齋、葷碗菜，還有飯盆、鹼粽、碗筷、酒杯、金香……這兜微毛末節做盡馬虎不得，平常時這下吾家娘會上來過目一下，巡看有擺好勢無？這下佢嗄無力氣行上樓；一直到下晝五點零，雨較無落恁大个時節，吾老公正載佢去附近診所注一管消炎止痛針。第二朝晨，看佢面較春風，講話較自然，係無，前幾日面臭臭仔，講話無神氣，做子女个心肝肚已艱苦。爺仔入院就當煩勞，這滿哀仔係有麼个三長兩短，該就尷尬無結煞了！

親像七月半前兩日趕風搓吂來，該下晝先普渡拜好兄弟：佢毋單淨三牲，糖糕、水果、連茶米、米、油、鹽、咖啡、乳粉、雞精、還有自家个粽仔……一抹煞做得入嘴坑个東西，撩最近所有囤積个食品，對兩隻大冰箱清出來，排淰兩大桌。我看到嘴擘擘仔，家娘親像會變奇術樣仔！你仰般也無辦法改變厥个慣俗，隋厥心意，恩做人世細，恬恬跈等做，一開嘴表示自家个愐法，該就萬事壞蹄了！因爭，同家娘溝通愛用學老話，我講學老無滑溜；又佢這下耳公背背愛大嫲牯聲慢慢講，係口氣忒急，佢又誤會你無誠意會發閼。

我試著歸日跈到厥身旁，揣厥个愐想來行踏，確實系當費氣个。毋過，伸一禮拜零，就愛開學了，該央時，麼人來陪伴這老哀仔呢？還有吾家官還愛請看護个來照顧鼻胃管&氣切管[雙管病人]，錢銀好解決？係有恁了利，該就阿彌陀佛了！

經過16天  北瓜的表皮微皺 好像脫水一些

******************************************************************************************

昨晡朝晨台北落雨，尤其12:00點邊仔，親像天公爺用大面盆潑水下來，一陣大風馳雨打忒吾想愛轉通霄个愐法，正打電話分吾家娘同老公，講我講話無算話，落雨恁大，我無愛轉去咧。這央時之前成點鐘仔(這時大約一小時之前)，阿林同阿賴邀請我去河濱公園橋下打嘴鼓，電話正講煞，天時就拚大雨哩!

這陣風馳雨打亂吾个心情，「愛轉抑無愛轉去」一直在吾腦筋打轉，想著該下吾老公在電話肚聽著我無愛轉去，略略仔發譴个口氣：「隨便你!愛無愛轉，你自家決定!」我嗄想愛轉去了。

煞煞查看火車時刻表，13:34松山有一枋海線莒光號。晝也赴毋掣食(中飯也來不及吃)，三步趕做兩步，擎等遮仔(拿起雨傘)，就出門追公車去車頭。買咧車單，正打電話同阿賴、阿林費失禮(道歉)。

清晨，步入百年老校【老松國小】的校史步道，心情是愉悅美好的。

張捷明老師勤奮好學，下午跟大夥兒一起【e化教學資源與設備的應用】充電，與大埔腔美女

目眨眨仔看等吾老公轉去通霄

細人時

係一皮含笑草(含羞草)

看著人就遽遽

囥等糾起來