阿芳心曲

2019/07/16(二)

下晝2:00~3:30快樂跳排舞。4:00邊仔轉去活動中心拿轉細水壺，好得教練同學還在該位。續下來到學校指導講演&朗讀小朋友，三、四年生个細倈仔斯無恁該分佢心肝定疊認真學習啊!一直到會7:00正轉到屋下。

梅子line一封「祭父文」愛𠊎修整，同佢打胖嘴咧半點零鐘較加，洗身洗好咧、食夜過咧，坐下來發琢愕一下，感覺吂罅胲，還想食東西，又齕一粒前一暗晡自家包个南部粽仔，就愛這種綿綿絡絡糯米个味緒。講會大箍毋係無理由。

續下來還入去灶下烳番豆，定時器設定半點鐘，打開電視9:00零，全部新聞都講國民黨初選結果分析親像催眠劑，電視一關入間項，門一關，電扇一撙，橫到眠床黏時睡忒。

11:30邊仔，半夢半醒中聽着有門鈴聲，一聲接一聲，緊來緊大聲，這央時水龍車咿喔咿喔接近來，還扡着係梅子來，吂知正打開大門，好多位警察&消防隊員煞煞行落吾屋肚檢查，灶下一鑊番豆像火炭粒，還逐間間房檢查一遍，尋看啊有室內防火警報器無，結果係電路無連線。雙證件檢查，還簽名切結，我還戇戇問:「會留下前科記錄無?」好得無分佢開「公共危險罪」罰款。毋過，對鄰舍十分敗勢啊!

共樓層个另外三家人全部擠爆電梯間，係無同鄉个徐先生119報案，毋知愛造成仰般嚴重个火災啊?

水火無情，愛小心火燭。阿彌陀佛!眾神保庇~~~

2019/07/17(三)

恁早！

台南阿蓮姊係歇在吾這棟大樓頂樓个阿婆，

佢大我10歲，降有一子三女做盡結婚了。

佢兩公婆在台南事業小成，生活豐湧¹，

後生時節也蹶山²，這下事業交分後生仔，

輒常³兩老仔打高爾夫運動。

毋過，看佢外表大箍⁴豐滿，著衫當莊頭阿婆个樣仔，

一滴都毋會聯想著佢係好額人⁵，

低調再過低調，做得恁樣形容。

厥四個子女全係留學英美个，

這星期老周對拜一暗晡轉來台北，到今吂下南。

親像發夢樣仔，毋敢相信到底仰般仔?

佢恁放心摎老哀仔交分印尼嫲照顧!

該印尼嫲乜犧牲放假無想去桃園同老公[會面]?

嘿~𠊎詐毋知仔，毋想愛去問到一隻柄來擎，

仰仔厥屋下个事頭做盡輪毋著𠊎來插，

做一個閒人較有福。

吾自家台北屋下還欠一擺大拚掃，一直拖拖挷挷無想愛停動，

書籍雜物堆歸間，一抹煞愛丟愛擲个東西佔了屋下人活動个空間。

阿香係大樓清潔員，做咧十過二十年年。

佢係中國江西南昌人，妹仔3歲，倈仔吂對歲老公就消忒，為著渡大一對子女，2年後嫁來台北，台灣老公原旦在熱炒店炒菜做廚師，包尾乜感覺阿香同人拚掃ten賺較輕鬆又好賺，一日正兩點鐘定定，較好絡食，就跈等餔娘做清潔，戴在吾屋下附近个一間細公寓，兩公婆勤儉打拚，和捼生活，在台灣這片無降，該對江西个子女避暑、寒假就會過來同台北後爺、哀仔共下歇一駁仔，會ten手阿姆做事，這下兩姊妹就有台灣居民權咧。阿香計畫倈仔係講在台北結婚，愛買一間屋仔分佢，南昌有三間贌人个屋舍做得賣忒相添。實在服佢!一個無讀幾多書國小畢業个中國婦人家，憑一雙手撐起自家同大細个一片天。

總講阿香人窮志不窮，妹仔繳到英國留學，25歲就拿著商業經濟碩士轉北京食頭路，月給8600人頭紙，相當新台幣43000左右，屋稅3600人頭紙，還扣千過銀退休基金這兜稅金，無法度有孝阿姆咧。阿香當阿莎力同妹仔講，該當愛生活開銷無罅，做阿姆佢會補助。

[豬仔無肥顛倒狗仔較肥]妹仔人靚又會讀書，倈仔乖乖仔讀專科定定。有一日臨暗仔，兩子哀坐在下班了个管理員个位仔脣在嘀嘀咕咕，原來阿香在安慰失戀个妹仔。

這江西妹仔在英國留學時，認識一位哈爾濱个細倈仔，兩儕拿著碩士，共下在北京上班歇共下。細妹仔識去哈爾濱，細倈仔也來過南昌尞。毋過，前一站仔，細倈仔去南京出差時節，同前女友舊情復燃一夜情，這不結个前女友還傳同細倈仔親密相片分細妹仔。當然感情破裂，無法度行下去。細倈仔千保證萬拜託，乜無法度買收細妹仔个芳心。細妹仔辭忒北京个頭路，暫時來阿姆這片散心，阿香還渡佢去市府轉運站阪急百貨大肆採買。

係講頭那愛剁下來分妹仔準球踢，阿香乜肯啊!

國父紀念館的河津櫻

前年，冬下仔                                      前年，年底

冷咻咻，天濛濛                                   冷颼颼，霧茫茫 

娘婆開在路脣，燥兮兮                          芒花開在路旁，乾兮兮

今年，年下子                                      今年，年底

天時好，恁燒暖                                   風和日麗好時光

娘婆伸出腰骨搖阿搖                              芒花挺直腰桿搖啊搖

愐起吾婆                                            想起我的祖母

今晡朝晨在【北市客語教師】LINE群組，石平先生擲出一篇華文小段文字，徵求翻譯做客語文。馬上有人回應，感覺係一種當生趣个「共下學習」个另外方式。

華語原文:

小時候，儍儍的，什麽事都不懂，看到女孩子臉會紅，頭低低的，都不敢正視，如今頭髪鬍子都已白，也成了（老鳥精），看到美麗韵妳，很自然的想跟妳聊聊，臉不再紅，回首來時路，安排個時間大家聚一聚，説説以前的事。

紫鳳凰花

 綻放在杉林溪的花園裡

彷如一群展翅高飛的台灣藍鳳凰

台灣藍鵲性兇殘
名喚山娘攻擊強
喜食他鳥雛與卵
多姿多采藍鳳凰

226該日掛紙時節

看着4隻家濟仔

3隻烏同白間色个，1隻紅、白、黃、吊菜青間等个

做盡係用塑膠扁索仔(打包帶)織出來个，

就毋知係機器量產，抑係手工織出來个。

民國92吾姆過身，93年圓盆進塔時節，我有轉去頭份祖塋拜喏。

到今毋使再去，今年跈吾老弟去，主要愛去[認親]，

想愛看頭擺細人時節的細人伴。

毋過，今年堵到落雨，天時又寒，參加个宗親最少，

來台祖14世鳳逑公派下，到吾老弟這輩21世，既經8.9代咧，

代代相傳，現場我識个可能無到五股一股。

還係當歡喜啦!

最先堵着阿崇叔公个長子運泰叔，佢係吾个恩人。

2月25到2月28四連假，我轉去頭份參加陳屋掛紙。單淨觀禮定定，無拿香祭拜，妹仔儕除非圓盆，一般妹家掛紙無分妹仔拜个。我去逗鬧熱，主要想愛同同年伙房个[兒時玩伴]相認，五、六十年無見面，有兜全全喊毋出名仔，過程當生趣，結果非常滿足。

聽着吾大小娘姑兩公婆渡兩個妹仔、婿郎來[轉妹家]，食飽晝就緊拚拚仔轉通霄去。毋過226當晝這餐，老人家擎鍋鏟，妹仔、孫女ten手聯合煮來食，因為我兩公婆吂轉到屋下。老家娘一生人煮食慣慣，這下膝頭痛、無法度行去市場買妹仔吩咐愛食个[苑裡魚丸]，佢就拜託隔壁个黑寶嬸去買，吩咐買兩斤，佢聽做五斤，害吾小娘姑無結無煞。係講我有在屋下就好啊。

續下來我搣咧兩日，小郎叔姆乜有轉來看老人家，佢食齋，一直就無搭灶下事頭，[習慣成自然]，屋下三餐料理就順理成章對老家娘身項跌到大心臼吾个肩頭頂。煮食，本旦就係吾个趣味，難毋着我，毋過在通霄我就當緊張、無輕鬆，因爭有壓力，驚無合家娘个意。

哈!就昨晡日228，我得着家娘个阿𧩣咧------今過做得有自信，輕鬆來煮食咧。

事情係恁樣个:

2016/9/27(二)

因爭梅姬Megi風搓來                                     因為梅姬颱風來勢洶洶

今晡日放假一日                                           今天放颱風假一天

妹仔昨晡日台北開會                                      女兒昨日剛好台北開會

家娘同吾老公又留在台北                                 婆婆和我先生也在台北

難得个歸屋下人共下在屋下聽風看雨                   難得全家共處守著家聽風觀雨

該梅姬煞猛發大風落大雨                                 那梅姬風姊使勁發威颳風下雨

分人膽顫心驚嚇到心肝哱哱飆　　　　　　　　　  給人膽顫心驚忐忑不安

借這機會同屋下人談哆　　　　                         藉機與家人聊天溝通

昨晡日¹用word寫好正貼入來PO文，效果不理想。

今晡日再過來直接在這寫，看效果仰般²?

快樂个星期一，朝晨去運動，排舞隊講11/6愛組松山隊表演。

美珠報了名，講前一禮拜愛旅行無日日來練，驚跳毋好影響全隊。

班長嗄³安慰佢:

「無相干，還恁久正表演。阿芳就敢去，你仰毋敢?」

蛤!麼个同麼个⁴，𠊎敢有恁㜮⁵  ?

確實啦，班長無毋著。

2016/09/25(日)

今晡日[1]過到當有搭碓[2]，感覺有成就感。

因爭愛主持9月份黃金客語讀書會，故所拿自家舊年个一篇散文做討論主題。這篇舊年識[3]投稿到[苗栗縣夢花文學獎]擙顇[4]个作品，包尾[5]改寫過一擺[6]，這下係[7]第三擺從頭到尾再過檢一遍，還係捩捩落落[8]，改咧又改。盡承蒙恁承蒙  捷明哥利用線上電腦攝影教學，教會𠊎仰般[9]使用word檔[插入]參考資料的加入注腳个方法。

除忒朝晨[10]買菜、煮三餐以外，做盡[11]搣[12]自家的東西，雖然家娘戴在這位[13]，𠊎乜[14]輕鬆無壓力。

      每日朝晨我打開平板，定著看着頭份鄉親頭擺(從前)雅虎、痞邦格友   LKK傳來个靚靚个照片同問候，五月節過吂(還沒)七月半正放避暑(暑假)，差毋多兩個零月前，我抽間(抽空)轉妹家，去尋佢(她)尞，對過年到這我毋識轉去頭份，無轉去自然就無機會同親切又當有話好講个梅珍姊談哆(聊天)。

      昨晡晡朝晨佢既經傳分我澎湖七美嵎雙心魚滬个分享，包尾又現場分享厥(giaˊ她的)屋脣自家種个茉莉花分我，我黏時(立即、馬上)感受着郭姊燒暖溫馨淰淰(滿滿)个愛，親像茉莉花清香鑽入吾个鼻公咧。感恩   感謝 ，   人生个朋友毋使多，有一、兩儕做得講心肚話，分享生活个歡喜同愁慮个就值千金咧。

      親像我去參加鄧導个火焰蟲客語社團，認識了林少英先生，知得[Accpelila無伴奏合唱]係美國黑人爵士音樂演唱，演唱者唱出靈魂深處真誠心聲，聲音感動自家同大自然所有有情者；我乜當珍惜同恁多湛斗个客家鄉親前輩共下來[搞生趣个客家]。毋過，這兩三月个每拜四暗晡兩點鐘个上課，我無盡認真，輒輒(經常)遲到缺席，等到8/28愛驗收成果、登台發表前5日，我偏着腳㬹(腳踝)行動無利便，差一息仔上不了台。

      該日暗晡跈等大家上台搞一輪(玩一趟)，好得驚驚險險可能有入選[初賽]个機會，續下來愛仰般(如何)來加強練習，增加凝聚力，往更深、闊面向精益求精，係enˊ(我們)Eagles家族愛共下來面對挑戰爭取勝利的機會。今晡暗晡就愛去教室集思廣議檢討補強，大家來參詳愛仰般來同節目裝到較靚、較精緻兜仔。愛搞，就愛搞出一隻較湛个色目，分傳統客家說唱藝術有更大个突破同創新。大家加油!

年視年過，恬恬仔過戇戇仔過                                          一年又一年，長溝流月去無聲一無所成

2016對五月節到七月半                                                                    2016從端午節到中元節

吾个無安神無定疊忒顯明                                                            我的心神不定坐立難安特別明顯   

今年天時特別作怪強強會熱膨風                                    今年氣候特異斯可忍孰不可忍真熱

五月節過三禮拜放避暑開始也無安生                     端午節後三週放暑假也不得閒

加羅林魚木

客家人安到【正月半】，有人安到【上元節】、【元夕】、【燈節】，細人仔擎燈籠、揣令仔(猜謎語)，過年歡樂至此，之後一切回歸如常，所以又稱【小過年】。客家傳統習俗 : 第二日正月十六係掛紙(掃墓)，毋過現下因應子孫上班上學，多改為清明前个週休二日之一去掛紙。

過咧正月半正安到過忒年。年年過年，年年康健又快樂 ? 該斯無定著哟!我總感覺年視年吾个體力大不如前，過咧耳順還有麼个好同人計較个 ? 一腳踏入棺材肚咧，修好心田修好嘴正著。好食毋好食，好講毋好講，做盡愛有準則。吾家娘前日還話我:[恁多歲數咧，講話毋好忒緊。]喊我愛改性仔，毋好執性傷人又不利自家。

這兜道理全全知，確實做着也可以，有決心洗心革面，就做得放下屠刀馬上成佛。我乜無心性同無氣力講三道四，自家身體就險險橫忒，仰會有閒講別人? 「伯勞嫲，嘴哇哇，有嘴講別人，無嘴講自家。」會教學生仔，也愛自己講着做着。

2016/2/20星期六補班，愛上2/12(五)个課。本成拜五前一下晝吾先生就載我轉屋下个，好得拜五下晝吂出門前，好朋友孟芳打電話同我講，我正留加一暗晡在台北。

講着愛轉通霄屋下，吾歸身有已複雜个愛恨情仇。37年來，做厥屋下个心臼，講值也當值，講做也免不了，全係自家分自家个壓力。因爭，吾家娘係世界最好个哀仔，怇惜花連盆、惜子連孫，子兒、心臼，妹仔、婿郎，一抹煞惜入心。2/20(正月13)拜六轉晝，吾先生衫褲摎我洗好、煮晝也煮好，我食飽晝嘴一抹，就跈厥車仔轉屋下。先繞過苗栗接着妹仔，續等就共下轉通霄屋下。

2015/12/27(日)惠月主席擔綱，討論年度得獎作品。

包括惠月新詩和捷明報導類皆獲獎。

2016/01/28(四康宏主席針對

【黃金客語讀書會】20週年，各人提出心得感受:

兩位寶島客語廣播電台名主持人  劉楨&惠月也是咱讀書會台柱。

張大哥講:

毋識1有个[驚艷]       (注1.:毋mˇ識siidˋ:未曾，從沒有過。)

一隻恁靚个揚蝶仔      (一個如此漂亮的蝴蝶)

停跎在吾个手背曩頂有十分鐘久  (停留在我手背上長達十分鐘之久)        

逐佢逐毋走            (趕牠趕不跑)

http://yenlin91.pixnet.net/blog/post/423235012

              讀了好友  嫣然【104年母親節】，𠊎正想著今年𠊎乜在屋下過了一個恬靜个阿姆節。

              本成拜六愛轉去通霄同吾家娘共下慶祝過節，妹仔無同意，講麼个悿歪歪還愛坐火車轉屋下，毋使恁費氣，阿媽斯毋會計較个，結果第二日阿姆節該下晝吾老公就載厥姆上來台北，先戴在吾小郎叔屋下，厥心臼5/12今晡下晝愛剖肚降倈仔，該吾家娘就正經做頭面个內婆太了。

                阿姆，係天下最戇奓da个人。歸日頭犁犁仔為屋下大細做一千擔，自從毋識要求子女愛答謝厥个功勞。我乜做了阿姆正知阿姆為大細个犧牲奉獻个心情。

                阿姆節該日臨晝仔妹仔講愛請𠊎食晝，想著前一駁仔兩子哀湊等想愛去銀翼食[煨麵]，路遠懶頭無食著，當晝𠊎就自家煮了兩碗豬骨高湯蔬菜煨麵，兩子哀食到飽𩜰𩜰已歡喜。該暗晡共下看電視影片，佢還同𠊎按摩肩頭，這係分𠊎盡滿足个阿姆節等路。

                 前兩禮拜寒著，一直無去看先生，想愛分佢自然好，嗄好無利，昨晡朝晨開兩百個銀去屋脣診所尋老先生看，佢聽𠊎講症頭，開了過敏同化痰兩種藥仔，講愛注意著較燒暖兜仔，對天時過敏啊，食了藥仔黏時人就鬆爽了。

              昨晡日歸日無開電腦，分目珠徹底歇睏。朝晨做運動，食飽夜還同老公去河壩脣行一點鐘路，感覺有停動就當對得起自家。這滿牙齒整好了，嘴斗當好，就驚食忒多，血糖又飆高。

(屋脣診所个先生講吾血糖控制到當好，受著先生个肯定，𠊎定著愛堅持控制飲食摎運動。)